सैन्य व पोलीस भरती सुरू करण्याची मागणी

महाराष्ट्रासह संपूर्ण देशात सैन्यभरती व पोलीस भरती करण्यासाठी घेण्यात येणारी स्पर्धा परीक्षा गेल्या तीन वर्षांपासून बंद आहे. सुशिक्षित बेकार विद्यार्थ्यांची संख्याही झपाट्याने वाढत आहे . स्पर्धा परीक्षा होत नसल्याने डिग्री घेऊन दारोदार फिरून नोकरीची भीक मागावी लागत असल्याची परिस्थिती निर्माण झाली आहे. कोरोना संसर्गजन्य आजारांमुळे अनेक कंपन्यांना टाळे लागले आहे. तेथील कामगारांना घरी पाठविण्यात आले आहे. हाताला काम मिळत नाही. याची दखल घेऊन शासनाने सैन्य व पोलीस भरती करण्यासाठी स्पर्धा परीक्षा घ्याव्यात आणि विद्यार्थ्यांचे होणारे नुकसान टाळावे, अशी मागणी माजी सैनिक फेडरेशनचे राष्ट्रीय अध्यक्ष ब्रिगेडियर सुधीर सावंत यांच्या नेतृत्वाखाली विदर्भ अध्यक्ष अर्जुन गवई यांनी जिल्हाधिकाऱ्यांना निवेदन सादर करून केली आहे.