गावठी दारू अड्डे पोलिसांकडून उद्ध्वस्त

दहा हजारांची दारू केली नष्ट; ग्रामीण भागात कारवाई नाही.

बुलडाणा : मुंबईतील मालवणी येथे घडलेल्या दारूकांडानंतर पोलीस विभागाने अवैध दारू अड्डय़ावर छापे मारून दारू अड्डे उद्ध्वस्त करण्याचा सपाटा सुरू केला आहे. बुलडाणा येथे पोलिसांनी गावठी दारू अड्डय़ावर छापे टाकून १0 हजारांची दारु जप्त करून ती नष्ट केली तसेच दारूचे अड्डेही उद्ध्वस्त केले. बुलडाणा शहर व परिसरात मोठय़ा प्रमाणात गावठी दारूच्या हातभट्टय़ा बाराही महिने सुरू असतात. बाराही महिने येथे दारूचा महापूर वाहतो. विशेष म्हणजे, हे व्यवसाय स्वत:ला नेते म्हणविणार्‍या अनेक महाभागांचे आहेत. पोलीस प्रशासनाच्या ह्यआशीर्वादाह्णने हे धंदे चालतात. या गावठी दारूपायी अनेकांचे संसार उद्ध्वस्त झाले आहेत, आजही होत आहे. पोलिसांनी शनिवारी भिलवाडा आणि सुंदरखेड येथील विविध ठिकाणच्या गावठी दारू अड्डय़ांवर धाडी टाकल्या. यावेळी पोलिसांनी गावठी दारूची विक्री करणार्‍या एका इसमासह बारा महिलांविरुद्ध गुन्हे दाखल केले. त्यांच्याकडून ९ हजार ८६0 रुपये किमतीची २१५ लीटर दारू जप्त केली आहे. या धडक कारवाईमुळे गावठी दारूविक्रेत्यांमध्ये एकच खळबळ उडाली आहे. उपविभागीय पोलिस अधिकारी समीर शेख यांच्या मार्गदर्शनाखाली शहर पोलिसांनी ही कारवाई केली. शहरातील भिलवाडा व सुंदरखेड येथे सुरू असलेल्या गावठी दारू अड्डय़ावर पोलिसांनी धाडी टाकल्या. पोलिसांनी भिलवाडा व सुंदरखेड येथील सिंधू काकडे, सुनीता गायकवाड, मिनल गायकवाड, निर्मला गायकवाड, सुमित्रा ठाकरे, सिंधू बरडे, चंदा मोरे, सुमन गायकवाड, प्रतिभा बरडे, लीला मोरे, मारुती बरडे व विमल बरडे यांना दारूविक्री करताना पकडले. त्यांच्याकडून ९ हजार ८६0 रुपये किमतीचा २१५ लीटर दारूसाठा जप्त केला आहे. आरोपींविरुद्ध गुन्हे दाखल करण्यात आले आहेत. या कारवाईमध्ये शहर पोलीस ठाण्याचे निरीक्षक नारायण तांदळे, सहायक पोलीस निरीक्षक ठाकूर, उपनिरीक्षक गोरे, गजानन सातव, तारकसे, दिलीप पवार, चिंचोले, घोते, निकम, हिंगे, ज्योती मोरे, मीनाक्षी मोरे व म्हात्रे या पोलीस कर्मचार्‍यांनी सहभाग घेतला होता. एकाच दिवशी पोलिसांनी दोन ठिकाणी गावठी दारूअड्डय़ावर धाडी टाकल्यामुळे मद्यविक्रेत्यांमध्ये एकच खळबळ उडाली आहे