जिल्हा परिषद शाळेचे क्रीडांगणातच बांधकाम

देऊळघाट येथील जिल्हापरिषद शाळेच्या क्रिडांगणातील बांधकामामुळे विद्यार्थी राहतील खेळापासून वंचित!

देऊळघाट : येथील जिल्हा परिषद उच्च माध्यमिक शाळेच्या जुन्या इमारतीपुढे क्रीडांगणात ८ खोल्यांच्या नवीन इमारतीचे बांधकाम सुरू करण्यात आले आहे. या नवीन इमारतीमुळे शाळेची जुनी इमारत निष्कामी होणार असून, विद्यार्थ्यांचे क्रीडांगणही नाहीसे होणार आहे. जिल्हा परिषद उच्च माध्यमिक शाळेत मराठी व उर्दू असे दोन माध्यम एकाच इमारतीमध्ये चालविले जाते. विद्यार्थ्यांची संख्या जास्त झाल्यामुळे राष्ट्रीय माध्यमिक शिक्षा अभियानातून शाळेच्या नवीन इमारतीसाठी ५७ लाखांच्या निधीतून ८ खोल्या मंजूर झाल्या. ही नवीन शाळेची इमारत दुमजला राहणार असून, तळमजल्यावर ४ आणि वरच्या मजल्यावर ४ अशा आठ नवीन खोल्यांचे बांधकाम केले जाणार आहे; या इमारातीमुळे शाळेचे मोठे क्रीडांगण पूर्णपणे नाहीसे होणार आहे. यामुळे सदर बांधकाम थांबवून मोकळ्या जागेवर नवीन इमारातीचे बांधकाम करण्यात यावे, अशी मागणी गावातील पालक मंडळींकडून केली जात आहे.