एकदा लोणची, मसाला, चटणी बनविली असता वर्षभराची चिंता मिटत असल्याने लाल मिरची व मसाल्याचे पदार्थ खरेदीला पसंती दिली जात आहे. कोरोनाच्या पार्श्वभूमीवर मागील उन्हाळ्यात लॉकडाऊन करण्यात आले होते. बाजारपेठ बंद असल्याने मिरची व मसाल्याचे पदार्थ फारसे खरेदी करता आले नाहीत. अनेकांनी तयार मसाले व चटणीला पसंती दिली होती. या वर्षीही कोरोना असला, तरी सध्या बाजारपेठ काही वेळ सुरू राहत आहे. त्यामुळे अनेक महिला लाल मिरची व मसाल्याचे पदार्थ खरेदी करण्यासाठी सरसावल्या आहेत. गतवर्षीपेक्षा लाल मिरची व मसाले पदार्थांच्या किमतीत किंचित वाढ झाली आहे. तरीही अनेक गृहिणी मध्यम दर्जाच्या मसाल्याचे पदार्थ खरेदी करीत असल्याचे चित्र आहे.
मिरची येते परराज्यातून
जिल्ह्यात मध्यप्रदेश, आंध्र पदेशातून लाल मिरची विक्रीसाठी येते. जिल्ह्यात काही शेतकरी मिरचीची लागवड करीत असले तरी हिरव्या मिरच्या विक्रीलाच पसंती दिली जाते. क्वचित शेतकरी लाल मिरच्या विक्री करतात. त्यामुळे बाहेरील राज्यांतूनच लाल मिरची आयात करावी लागते. जिल्ह्यात गावरान मिरचीला मागणी असली तरी कमी किमतीच्या विविध मिरच्या विक्रीसाठी आल्या आहेत.
मिरचीचे दर (प्रति किलो)
सिमला - ३००
चपाटा - ३००
बन्ना- २८०
लवंगी - १८०
मसाल्याचे दर (प्रति किलो)
धने - १२०
जिरे - १६०
तीळ - १२०
खसखस - ११००
खोबरे - २००
मेथी - ८०
हळद - १२०
अन्य मसाले (प्रति दहा ग्रॅम)
लवंग - १०
बदामफुल - १०
बडीशेप - ३
नाकेश्वर - २०
धोंडफूल - ७
वेलदोडे - ४०
गृहिणी म्हणतात...
मसाला, वेगवेगळ्या चटण्या दरवर्षी उन्हाळ्यातच करून ठेवत असतो. मागील वर्षी लॉकडाऊनमुळे अनेक वस्तू वेळेवर उपलब्ध झाल्या नाहीत. त्यामुळे यंदा अगोदरच सर्व साहित्य खरेदी केले आहे. मसाल्याच्या दरामध्ये किंचितशी वाढ झाल्याचे दिसून येते.
- कोमल पवार, गृहिणी.
दरवर्षी मसाला, चटणी, लोणची घरीच करतो. गतवर्षीपेक्षा मसाल्याच्या दरामध्ये काही प्रमाणात वाढ झालेली आहे. आता उन्हाळा सुरू झाला असून, मसाले, चटण्या बनविण्यास सुरुवात केली आहे.
- वनिता गावंडे, गृहिणी.