बुलडाणा आगाराची बस ((एमएच-२०-बीए-४१६९)) ही बुलडाण्यावरून नागपूरला जात होती. दरम्यान, बोथा घाटामध्ये समोर येणाऱ्या दुचाकी व कारमुळे मोठा अपघात होण्याची शक्यता होती. त्यामुळे प्रसंगावधान दाखवत बसचालकाने त्याची बस रस्त्याच्या कडेला घेतली. मात्र बसवर नियंत्रण मिळविण्याच्या नादात ही बस रस्त्याच्या कडेला असलेल्या खड्ड्यात गेली. त्यामुळे बसमधील काही प्रवासी किरकोळ जखमी झाले. सुदैवाने कुठलीही मोठी हानी झाली नाही. बसचालकाने प्रसंगावधान राखल्याने हा अपघात टळला व प्रवाशांनी खचून भरलेल्या या बसमधील प्रवासी सुखरूप बसमधून खाली उतरले. दि. २४ सप्टेंबर रोजी दुपारी ३ वाजेच्या सुमारास हा अपघात घडला.
--आगार प्रमुखांची तत्परता--
या अपघाताचे वृत्त कळताच आगार प्रमुख रवी मोरे यांनी त्वरित एक पथक घटनास्थळी मदतीसाठी पाठविले. सोबतच प्रसंगी जिल्हा सामान्य रुग्णालयात जखमीला आणल्यास त्यांच्यावर त्वरित उपचार करून आवश्यक मदत देता येईल यासाठी त्यांनी प्रयत्न केले. जवळपास दीड ते दोन तास एसटी महामंडळाच्या बुलडाणा आगाराचे एक पथक जिल्हा सामान्य रुग्णालयात होते. दरम्यान, एका जखमीचा शोध घेऊन त्यास नियमानुसार तत्काळ दिली जाणारी मदत करण्यात आली.