बिबट्याच्या हल्ल्यात म्हैस ठार

चिखली व परिसरातील पेट्रोलपंपासमोरून पलसखेड, वळती, सवणा, सावरगाव डुकरे व अनुराधानगर परिसरात बिबट्यांच्या जोडी मुक्तसंचार करताना नागरिकांना दिसून आली आहे. नागरिकांना आढळून आलेली बिबट्यांची ही नर-मादीची जोडी असल्याचे समजते. या जोडीने अनुराधानगर परिसरातील अशोक किसनराव वाघमारे यांच्या म्हशीवर हल्ला चढवून तिला ठार केले असल्याने या भागातील शेतकरी भयभीत झाले आहेत. या बिबट्यांचा तत्काळ बंदोबस्त करावा व नुकसान झालेल्या शेतकऱ्यांना भरपाई मिळावी, अशी मागणी केली जात आहे. दरम्यान, बिबट्यांचा मुक्तसंचार असलेल्या या भागात सकाळ-संध्याकाळ नागरिक फिरण्यासाठी जातात तसेच सध्या रब्बी हंगामातील पिकांना पाणी देण्यासाठी शेतकऱ्यांना रात्री-बेरात्री शेतशिवारात जावे लागत असल्याने या भागातील शेतकरी व नागरिक दहशतीखाली वावरत आहेत. दरम्यान, या घटनेची माहिती मिळताच वनपरिक्षेत्र अधिकारी मेरत यांनी घटनास्थळी भेट देऊन पंचनामा करून नुकसानग्रस्त शेतकऱ्यांना मदतीचे आश्वासन दिले आहे.