बीबी : किनगाव जट्टू शेत शिवारात एका महिलेचा मृतदेह लिंबाच्या झाडाला गळफास घेऊन लटकलेल्या अवस्थेत २६ मार्च रोजी आढळून आला आहे. त्यामुळे ही हत्या असल्याचा संशय निर्माण झाला आहे. याप्रकरणी बीबी पोलीस स्टेशनला अज्ञात आरोपीविरुद्ध गुन्हा दाखल करण्यात आला आहे.
किनगाव जट्टू ते दुसरबीड जाणाऱ्या रोडच्या दक्षिणेला असलेल्या ई क्लास जमिनीवर एका लिंबाच्या झाडाला एक महिला मृत अवस्थेत लटकलेली आहे, अशा माहितीवरून बीबी पोलीस स्टेशनचे ठाणेदार एल. डी. तावरे यांनी पोलिसांचा ताफा घटनास्थळी पाठवून प्रत्यक्ष पाहणी केली असता नीता वडील वामन आडे (२६, रा. आईचा तांडा किनगाव जट्टू) ही लिंबाच्या झाडाला पांढऱ्या रंगाच्या दोरीने लटकलेल्या अवस्थेत दिसून आली. पोलिस पाटील वसंत नगर यांचे फिर्यादीवरून पोलीस स्टेशन बीबी येथे अज्ञात आरोपी विरुद्ध गुन्हा दाखल करण्यात आला आहे. याबाबत पोलीस अधीक्षक चावरीया, अप्पर पोलीस अधीक्षक बनसोडे, उपविभागीय पो. अधिकारी यामावार यांना माहिती देऊन त्यांच्या मार्गदर्शनात तपास सुरू करण्यात आला आहे. तात्काळ श्वानपथक, फिंगरप्रिंट युनिट घटनास्थळी दाखल झाले व तपास सुरू केला. या प्रकरणाचा पुढील तपास ठाणेदार तावरे, उपनिरीक्षक व्यवहारे व पोलीस अंमलदार करीत आहेत.