चिखली : शेतात कोणीही नसल्याचे पाहून अज्ञात चोरट्यांनी देऊळगाव घुबे शिवारातील १३ शेतकऱ्यांच्या स्प्रिंकलरचे पितळी नाेझल एका रात्रीतून चोरून नेले आहेत. ही घटना १३ सप्टेंबर रात्री घडली आहे.
अंढेरा पोलीस स्टेशनांतर्गत येणाऱ्या देऊळगाव घुबे येथील बागवणी शिवारात असलेल्या गट नं.५९८ मधील शेतकरी भास्कर घुबे, विजय घुबे, अशोक कोकाटे, सुरेश घुबे, मंदा घुबे, मनोहर कोकाटे, उत्तम घुबे, रामेश्वर गोरे, ज्ञानेश्वर गोरे, नदंकिशोर गोरे, गजानन घुबे या शेतकऱ्यांनी शेतात पिकांना पाणी देण्यासाठी स्प्रिंकलर पाइप टाकलेले होते. १३ सप्टेंबर रोजी शेतातील कामे आटोपल्यानंतर नेहमीप्रमाणे शेतकरी सांयकाळी घरी परतले. शेतात कोणीच नसल्याचे हेरून अज्ञात चोरट्यांनी तब्बल १३ शेतकऱ्यांच्या शेतातील स्प्रिंकलरसाठी वापरले जाणारे सर्व पितळी नौझल लंपास केले आहे. १४ सप्टेंबरला शेतकरी सकाळी पुन्हा शेतात गेले असता ही बाब उघडकीस आली. यानंतर शेतकऱ्यांनी पोलीस स्टेशनला धाव घेत याबाबत तक्रार दाखल केली आहे. या प्रकरणाचा तपास ठाणेदार गणेश हिवरकर यांच्या मार्गदर्शनाखाली बिट अंमलदार पंजाबराव साखरे हे करीत आहेत.