गर्भपातादरम्यान मुलीचा मृत्यू!

तालुक्यातील पिंडकेपार येथील बाळबुद्धे यांच्या दवाखान्यात एका १७ वर्षीय मुलीचा उपचारादरम्यान मृत्यू झाल्याची घटना आज उघडकीला आली.

साकोली : तालुक्यातील पिंडकेपार येथील बाळबुद्धे यांच्या दवाखान्यात एका १७ वर्षीय मुलीचा उपचारादरम्यान मृत्यू झाल्याची घटना आज उघडकीला आली. पोलिसांनी या प्रकरणी आकस्मिक मृत्यूची नोंद केली असून मुलीला उपचारासाठी आणणारे चार जण फरार झाले आहेत. गर्भपातादरम्यान तिचा मृत्यू झाला अशी विश्वसनीय माहिती आहे. पिंडकेपार येथे डॉ. वसंत बाळबुद्धे यांचा दवाखाना आहे. या दवाखान्यात एक मुलगी मृतावस्थेत असल्याची माहिती पोलिसांना मिळाली. पोलिसांचा ताफा पिंडकेपार येथे पोहचला. पोलिसांनी मुलीचा मृतदेह शवविच्छेदनासाठी उपजिल्हा रुग्णालयात पाठविले. यावेळी पोलिसांनी डॉ. बाळबुद्धे यांना ताब्यात घेतले. मुलीला कोणत्या उपचारासाठी या दवाखान्यात आणण्यात आले याची निश्चित माहिती यावेळी देण्यात आली नाही. या संदर्भात पोलीस निरीक्षक भगवान खारतोडे यांच्याशी चर्चा केली असता ते म्हणाले, डॉ.बाळबुद्धे यांच्या सांगण्यानुसार, मुलीला कावीळ आजाराच्या उपचारासाठी आणण्यात आल्याचे सांगितले. कावीळचा आजार त्या मुलीला होता तर तिचा मृत्यू कसा झाला व मृत्यूनंतर तिच्या सोबत आलेले पळून का गेले? असे अनेक संशय व्यक्त करणारे प्रश्न निर्माण झाले. या प्रकरणी गावात विचारपूस केली असता, नाव न सांगण्याच्या अटीवर काही लोकांनी माहिती. यात सदर मुलीला तीन ते चार जणांनी डॉ. बाळबुद्धे यांच्या दवाखान्यात या मुलीला गर्भपातासाठी आणण्यात आले. गर्भपातादरम्यान त्या मुलीचा मृत्यू झाला. त्यामुळे सोबत असलेले इसम घाबरुन पळून गेले असे सांगितले. डॉ.बाळबुद्धे यांच्या दवाखान्यात बरेचदा गर्भपात केले जातात अशी माहिती मिळाली. यापूर्वीही या संदर्भात डॉ.बाळबुद्धे यांची तक्रार प्रशासनाला करण्यात आली होती. काही दिवसांपूर्वीच वैद्यकीय अधिकार्‍यांच्या चमूने या प्रकरणाची चौकशी केली. मात्र या प्रकरणात पाणी कुठे मुरले ते कळतेच नाही. फरार इसमांच्या शोधासाठी पोलिसांनी दोन पथक तयार करुन एक पथक तुमसरकडे व दुसरे पथक गोंदियाकडे पाठविले आहे. ओळख पटविण्यासाठी या पथकासोबत डॉ. बाळबुद्धे गेले आहेत. (तालुका प्रतिनिधी)