लाेकमत न्यूज नेटवर्क
भंडारा : परदेशात दुचाकी किंवा चारचाकी वाहन चालविण्यासाठी जिल्ह्यातील काही रहिवाशांनी ‘इंटरनॅशनल ड्रायव्हिंग लायसन्स’ (आयडीपी) काढले आहे. गत दहा वर्षाच्या आकडेवारीवर नजर घातल्यास जिल्ह्यातील ६७ जणांनी आयडीपी काढले असून, राहतात भंडाऱ्यात आणि लायसन्स काढले परदेशाचे, असे म्हणण्याची वेळ आली आहे.
उल्लेखनीय बाब, म्हणजे इंटरनॅशनल ड्रायव्हिंग लायसन्स या परवान्याची मुदत फक्त एक वर्षांसाठी असते. भारताबाहेर परदेशात वाहन चालविण्यासाठी इंटरनॅशनल ड्रायव्हिंग लायसन्स असणे अत्यावश्यक बाब आहे. याशिवाय परदेशात वाहन चालविणे म्हणजे दंडात्मक कारवाईला सामोरे जावे लागते. गत दशकभराच्या आकडेवारीवर नजर घातल्यास जिल्ह्यातील ६७ नागरिकांनी इंटरनॅशनल लर्निंग लायसन्स काढले आहेत. यात २०११मध्ये सहा, २०१२मध्ये पाच, २०१३ मध्ये चार, तर २०१४ मध्ये दहा जणांनी आयडीपी काढले आहेत. सर्वात जास्त लायसन्स २०१६मध्ये म्हणजेच १४ लायसन्स भंडाराकरांनी काढली आहेत. गतवर्षी म्हणजे कोरोना काळात भंडारा जिल्ह्यातील फक्त एका नागरिकाने इंटरनॅशनल ड्रायव्हिंग लायसन्स काढले आहे. गत सहा महिन्यात कोणीही आयडीपीसाठी अर्ज दाखल केला नाही.
बॉक्स
मुदत एक वर्षाचीच
आंतरराष्ट्रीय ड्रायव्हिंग लायसन्सची मुदत (वैधता) फक्त वर्षभरासाठी असते. याचा उपयोग पुष्कळ देशांमध्ये ओळख पटविण्यासाठी केला जाऊ शकतो. आंतरराष्ट्रीय ड्रायव्हिंग लायसन्स हा पुरावा आहे, की एखाद्या व्यक्तीने ज्या देशात तो जारी केला होता, त्या देशात वाहनचालकाचा वैध परवाना आहे. तसेच ती व्यक्ती परदेशात वाहन चालवू शकते, हेदेखील प्रमाणित होत असते. आंतरराष्ट्रीय ड्रायव्हिंग लायसन्समध्ये मुद्रित एकाधिक भाषा इतर देशांच्या अधिधारकांची माहिती सत्यापित करण्यास उपयुक्त ठरतात. भारतीयांना परदेशात कार भाड्याने आणि वाहन चालविण्यास मदत होईल.
बॉक्स
तुम्हालाही काढायचेच इंटरनॅशनल लायसन्स?
भारतात घरगुती रस्त्यावर वाहन चालविण्यासाठी परवान्यासाठी आवश्यक असणारी प्रक्रिया खूप सामान्य आहे. यासाठी स्थानिक आरटीओ कार्यालयात परवान्यासाठी अर्ज करावा लागेल. यानंतर आपल्याला लेखी परीक्षा आणि ड्रायव्हिंग चाचणी द्यावी लागते. ही परीक्षा उत्तीर्ण झाल्यानंतर, आपल्याला सहा महिन्यांसाठी लर्निंग लायसन्स प्रदान केला जाईल आणि या कालावधीत आपल्याला कायम परवान्यासाठी अर्ज करावा लागतो. आंतरराष्ट्रीय वाहन मिळविण्यासाठी आवश्यक कागदपत्रे आणि प्रक्रियेमधून जावे लागते. त्यानंतर लायसन्स मिळते. इंटरनॅशनल ड्रायव्हिंग लायसन्स काढण्यासाठी पासपोर्ट असणे आवश्यक आहे. यासोबतच व्हिसा, येथील लायसन्स, आधार कार्ड व मेडिकल सर्टिफिकेट आवश्यक असते. लायसन्स काढण्यासाठी एक हजार रुपयांचे शुल्क अदा करावे लागते. त्यानंतरच आयडीपी लायसन्स दिले जाते.
कोट बॉक्स
इंटरनॅशनल ड्रायव्हिंग लायसन्स काढण्यासाठी एक प्रक्रिया अवलंबविली जाते. ज्यांना आयडीपी आवश्यक असलेली कागदपत्रे अर्जासोबत जोडून शुल्काचा भरणा करून लायसन्स प्राप्त करता येते. अर्जामध्ये नमूद असलेल्या नियम व अटींचे पालन करणे आवश्यक आहे. या लायसन्सची वैधता वर्षभरासाठी असते. या लायसन्सचे नूतनीकरणही करता येते. यासाठी भारत सरकारने नियमात काही बदलही केले आहेत.
-राजेंद्रकुमार वर्मा,
उपप्रादेशिक परिवहन अधिकारी, भंडारा