मोकाट कुत्र्यांमुळे फुटले खुनाचे बिंग

सात जन्माची साथ निभावण्याच्या आणाभाका घेणार्‍या पती-पत्नीच्या पवित्र नात्यात वितुष्ट आले तर कोण कोणत्या पातळीवर जाईल, हे सांगता येत नाही. अशीच थरकाप उडणारी घटना तुमसर

तलावात सापडली हाडे : १५ महिन्यांपासून पुरला होता मृतदेह

मोहन भोयर- तुमसर

सात जन्माची साथ निभावण्याच्या आणाभाका घेणार्‍या पती-पत्नीच्या पवित्र नात्यात वितुष्ट आले तर कोण कोणत्या पातळीवर जाईल, हे सांगता येत नाही. अशीच थरकाप उडणारी घटना तुमसर तालुक्यातील देव्हाडी येथे दि.२0 मे रोजी उघडकीस आली. मुलगा आणि भावाच्या मदतीने महिलेने पतीचा फावड्याने खून केला. पुरावा नष्ट करण्यासाठी घरातच खडडा खोदून पुरला. त्यानंतर घराला कुलूप ठोकून ही महिला निघून गेली. दरम्यान या घराचा काही भाग खचला. त्या घरात मोकाट कुत्रे शिरली आणि १५ महिन्यापूर्वी केलेल्या खुनाचे बिंग फुटले.

देव्हाडी येथे काशीराम कुकडे हा बेलदारी काम करायचा. त्याचे २0 वर्षांपूर्वी खैरलांजी येथील शीला पंचबुद्धे हिचेशी लग्न झाले. त्यावेळी ते देव्हाडीत एकत्र कुटूंबात राहायचे. काही वर्षे सुखाचा संसार सुरु असतानाच काशीरामला दारुचे व्यसन जडले. त्यानंतर पतीपत्नीमध्ये भांडणे सुरु झाली. दरम्यान गावातील तलाव परिसरातील शेतात लहानसे घर बांधून ते राहू लागले. परंतु भांडणे सुरुच राहिली. नेहमीच्या कटकटीतून सुटका करण्यासाठी पत्नी शीलाने कट रचला.

असा केला खून

घटनेच्या दिवशी काशीरामची पत्नी शीला, मोठा मुलगा संतोष, लहान मुलगा सुरज व तिचा भाऊ संजय पंचबुद्दे हे देव्हाडीत होते. त्यावेळी त्यांच्यात कडाक्याचे भांडण झाले. लहान मुलगा सुरज हा वडिलाचा लाडका असल्यामुळे त्याला मटन आणण्यासाठी बाहेर पाठविले. त्यानंतर मोठा मुलगा संतोषने काशीरामच्या डोक्यावर फावड्याने वार केला. यात तो खाली कोसळला. त्यानंतर संजयने त्याच फावड्याने पुन्हा वार केले. त्यातच त्याचा मृत्यू झाला. त्यानंतर घरातच दोन फुटाचा खड्डा खोदून मृतदेह जमिनीत पुरला.

काशीरामवर होता खुनाचा

प्रयत्न केल्याचा गुन्हा

संजय बहिणीच्या पतीच्या खूनात सहभागी होण्याचे कारण पोलिसांनी शोधले असता, दोन वर्षांपूर्वी काशीरामने संजयच्या आईवर कुर्‍हाड उगारली होती. त्यात ती थोडक्यात बचावली. याप्रकरणी काशीरामविरुद्ध ३0७ कलमान्वये खुनाचा प्रयत्न करण्याच्या आरोपात अटक झाली होती. एक दिवस काशीरामचा वचपा काढण्याची खूणगाठ संजय पंचबुद्धे याने बांधली होती.

पोलिसांनीही केले होते दुर्लक्ष

फेब्रुवारी २0१३ मध्ये काशीरामचा खून करुन मृतदेह घरात पुरल्यानंतर हे घर कुलूपबंद होते. काशीरामच्या घराच्या परिसरात कुणाचीही घरे नसली तरी मृतदेहाला सुटलेल्या दुर्गंधीकडे देव्हाडी पोलिसांचे लक्ष वेधले होते. परंतु पोलिसांनी याकडे दुर्लक्ष केल्यामुळे ही घटना दबून राहिली. अखेर १५ महिन्यानंतर या घराचा काही भाग खचला आणि मोकाट कुत्रे घरात शिरले. हे कुत्रे काही ना काही सामान घराबाहेर आणत असल्याचे पाहून लोकांनी उत्सुकतेतून घरात डोकावून पाहिले असता त्यांना खडडा खोदून बुजविलेल्या स्थितीत आढळून आला. पोलीस त्यावेळीच आले असते तर कदाचित ही घटना पूर्वीच उघडकीस आली असती.