भंडारा : जिल्ह्यात कोरोना रुग्णांच्या संख्येत वेगाने वाढ होत असून, सर्वाधिक रुग्ण भंडारा शहरातील आहेत. जणू भंडारा शहर कोरोना हाॅटस्पाॅट ठरू पाहत आहे. लगतच्या ग्रामपंचायतीतही रुग्णसंख्या वाढत असल्याने नागरिकांत भीतीचे वातावरण पसरले आहे. असे असले तरी नागरिक मात्र नियमांचे पालन करताना दिसत नाहीत.
भंडारा तालुक्यात आतापर्यंत ७ हजार ३६१ पाॅझिटिव्ह रुग्ण आढळून आले आहेत. त्यातील सर्वाधिक रुग्ण हे भंडारा शहर आणि लगतच्या ग्रामपंचायतींमधील आहेत. गत तीन दिवसांपासून तर भंडारा तालुक्यात विक्रमी रुग्णांची संख्या वाढत आहे. ३१ मार्चरोजी २८१ व्यक्ती पाॅझिटिव्ह आल्या होत्या, तर गुरुवारी ३२० जणांचा अहवाल पाॅझिटिव्ह आला आहे. विशेष म्हणजे जिल्ह्यात सर्वाधिक अॅक्टिव रुग्णही भंडारा तालुक्यात १४४७ आहेत.
शहरातील विविध भागांत कोरोना रुग्ण आढळून येत असून, लगतच्या ग्रामपंचायतीही त्यात भर घालत आहेत. गणेशपूर, भोजापूर, बेला, कारधा या गावांतही रुग्णांची संख्या आता वाढायला लागली आहे. भंडारा शहरात काही भागात प्रशासनाने कंटेनमेंट झोन लावले आहे. एमएसईबी काॅलनीत गुरुवारी रुग्ण आढळल्याने गणपती मंदिर परिसरात कंटेनमेंट झोन लाऊन प्रशासनाने हा परिसर प्रतिबंधित केला आहे. कोरोना रुग्ण वाढण्यामागील कारण म्हणजे शहरात नियमांचे होणारे सर्रास उल्लंघन होय. गत सात दिवसांपासून रुग्णसंख्या वेगाने वाढत असली, तरी नागरिक मात्र बिनधास्तपणे फिरत आहेत.