आशिष पटले (३३) रा. देवरी देव असे गंभीर जखमीचे नाव आहे. तर गणेश राहगडाले (४५), दिनेश राहगडाले (३२) रा. देवरी देव आशी आरोपींची नावे आहेत. सिहोरा येथे आठवडी बाजारासाठी देवरी देववरून राजकुमार राणे आणि आशिष पटले आले होते. खरेदी केल्यानंतर सायंकाळी गावी पोहोचले. त्यानंतर आशिष आणि राजकुमार गावातील चौकात थांबले. मोटारसायकलवर बसून असताना गणेश व दिनेशने धारदार विळ्याने हल्ला केला. आशिषच्या शरीरावर विळ्याने अनेक ठिकाणी वार केले. डोक्यावर, मानेवर गंभीर जखमा झाल्या. हाताची बोटे तुटली. मुख्य चौकात प्राणघातक हल्ला झाल्याची माहिती मिळताच नागरिक धावून आले. परंतु आरोपी पसार झाले होते. गंभीर जखमी आशिषला विनोद पटले यांचे मदतीने भंडाराच्या खासगी दवाखान्यात उपचारासाठी दाखल करण्यात आले आहे. हल्ल्यात गंभीर जखमी झाल्याने आशिषची प्रकृती स्थिर असल्याची माहिती मिळाली आहे.
घटनेनंतर पसार झालेल्या दोघांनाही अवघ्या दोन तासांत पोलिसांनी ताब्यात घेतले आहे. हल्ला करण्याच्या एक दिवस आधीच दारूवरून दिनेश व आशिषचे भांडण झाले होते. याच भांडणाचा राग दोन्ही भावंडाचे मनात होता. याच वादातून आशिषवर प्राणघातक हल्ला करण्यात आला असल्याची माहिती आहे. राजकुमार राणे यांच्या तक्रारीवरून सिहोरा पोलिसांनी भादंवी ३२६, ३२३, ५०४, ५०६, ३४ नुसार गुन्ह्याची नोंद केली आहे. पोलीस निरीक्षक नारायण तुरकुंडे यांच्या मार्गदर्शनात सहायक पोलीस निरीक्षक महेंद्र शहारे तपास करीत आहेत.