लोकमत न्यूज नेटवर्क
बीड : जिल्ह्यात सद्यस्थितीत कोरोनाची दुसरी लाट ओसरत असल्याने दिलासा मिळत आहे. असे असले तरी तिसरी लाट येण्याची भीती व्यक्त केली जात आहे. यात लहान मुलांना अधिक धोका असल्याचे मत वैद्यकीय तज्ज्ञांनी व्यक्त केल्यानंतर सर्व प्रशासन कामाला लागले आहे. बीडमध्येही आरोग्य विभागाने बीड जिल्हा रुग्णालयासह अंबाजोगाई स्वाराती वैद्यकीय महाविद्यालय आणि इतर ठिकाणी स्वतंत्र वॉर्ड तयार केले आहेत. येथे बालरोगतज्ज्ञांची फौजही तयार ठेवल्याचे सांगण्यात येत आहे.
जिल्ह्यात जिल्हा रुग्णालयासह जवळपास ७० आरोग्य संस्था आहेत. पहिल्या लाटेचा सामना झाल्यानंतर दुसऱ्या लाटेत लोकांना खाटांअभावी मोठा त्रास सहन करावा लागत आहे. याच लाटेत मृत्यूची संख्याही वाढली होती. आजही हे मृत्युसत्र कायम आहे. ते रोखण्यासाठी प्रयत्न सुरूच असल्याचा दावा आरोग्य विभाग करत असला तरी, अद्याप त्यांना यात यश आलेले नाही. दुसऱ्या लाटेचा सामना सुरू असतानाच तिसरी लाट येण्याची भीती व्यक्त केली जात आहे. यात ० ते १५ वर्षे वयोगटातील मुलांना अधिक धोका असल्याचे सांगण्यात येत आहे. हाच धागा पकडून राज्य व जिल्हा स्तरावर नियोजन केले जात आहे. बालरोगतज्ज्ञ, परिचारिका, वॉर्डबाॅय यांची नियुक्ती केली जात आहे. तसेच माता व बालकांना राहण्याची व जेवणाचीही सोय केली जाणार आहे.
दरम्यान, सोमवारी दुपारी जिल्हा शल्यचिकित्सक डॉ. सूर्यकांत गित्ते यांनी जिल्हा रुग्णालयातील स्वतंत्र वॉर्डची पाहणी केली. यावेळी बालरोगतज्ज्ञ डॉ. सचिन आंधळकर, मेट्रन संगीता दिंडकर आदींची उपस्थिती होती.
प्रत्येक ठिकाणी ओपीडी आणि शरिक करून घेण्याची सोय
जिल्हा रुग्णालयात न्यू लेबर वॉर्डमध्ये ओपीडी असेल. येथे तपासणी करून रुग्णाला ॲडमिट केले जाणार आहे. तसेच प्रत्येक ठिकाणी स्वतंत्र वॉर्ड तयार केले असून येथेही एक फिव्हर क्लिनिक असणार आहे. याबाबत जिल्हाधिकारी रवींद्र जगताप, जिल्हा शल्यचिकित्सक डॉ. सूर्यकांत गित्ते यांनी आढावा घेतला आहे.
जिल्हा रुग्णालयात एकूण ५ वाॅर्ड तयार केले आहेत. येथे नवजात बालकांसाठी एक वॉर्ड असेल. त्यांच्या मातांची राहण्याची, जेवणाची पूर्ण सोय केली जाणार आहे. बाधित मुलांना आधार देण्यासाठी आरोग्य विभागाचे कर्मचारीही तैनात असणार आहेत.
जिल्ह्यात बीड जिल्हा रुग्णालयात १५० ऑक्सिजन खाटा आहेत. तसेच स्वाराती अंबाजोगाईत १५०, परळी व केजमध्ये प्रत्येकी ४०, आष्टी, गेवराई व पाटोदा येथे प्रत्येकी २० ऑक्सिजन खाटा तयार केल्या आहेत. यासह बीड व स्वाराती अंबाजोगाईत प्रत्येकी ५० खाटांचे आयसीयु केले आहे.
जिल्ह्यात ६६० ऑक्सिजन खाटा तयार केलेल्या आहेत. यात बीड व अंबाजोगाईत प्रत्येकी ५० खाटांचे आयसीयु असेल. तसेच ज्यांनी आतापर्यंत बाल विभागात काम केलेले आहे, अशा ४० नर्सेसनाही प्रशिक्षण देऊन योग्य मार्गदर्शन केलेले आहे. सरकारी डॉक्टर कमी पडल्यास खासगी लोकांची मदत घेतली जाईल.
- डॉ. सूर्यकांत गित्ते, जिल्हा शल्यचिकित्सक, बीड
===Photopath===
010621\01_2_bed_13_01062021_14.jpg~010621\01_2_bed_12_01062021_14.jpeg
===Caption===
डॉ.सूर्यकांत गित्ते~जिल्हा रूग्णालयात तयार केलेल्या स्वतंत्र वॉर्डची पाहणी करताना जिल्हा शल्य चिकित्सक डॉ.सूर्यकांत गित्ते. सोबत बालराेग तज्ज्ञ डॉ.सचिन आंधळकर, मेट्रन संगिता दिंडकर आदी होते.