सराफा व्यापाऱ्याचा खून करणाऱ्यांना कठोर शासन करा

लोकमत न्यूज नेटवर्क

शिरूर कासार : येथील सराफा व्यापारी विशाल कुल्थे याचा निर्दयीपणे खून करणाऱ्या आरोपींना कठोर शासन व्हावे, हे प्रकरण जलदगती न्यायालयात चालवावे, अशी मागणी जिल्हा सुवर्णकार संघटनेने केली आहे.

दिनांक २० मेपासून गायब असलेला विशाल कुल्थे हा हरवला असल्याची फिर्याद कुटुंबीयांनी पोलिसांकडे २१ मे रोजी दिली होती. या फिर्यादीनुसार तपास सुरु असतानाच कुल्थे याला पळवून नेल्याचे समोर आले. त्यामुळे प्रथम हरवल्याचा व नंतर पळवून नेल्याचा आता उलगडा झाल्याने खुनाचा गुन्हा दाखल करून पोलिसांनी कार्यवाही सुरू केली आहे.

या प्रकरणातील आरोपींनी अगदी निर्दयीपणे या तरूणाचा खून केला असल्याने त्यांना कठोर शासन करण्याची मागणी जिल्हा सुवर्णकार संघटनेने निवेदनाद्वारे केली आहे. जिल्हाध्यक्ष सुधाकर बेदरे, नितीन टाक, रमण जोजारे, आदींनी उपविभागीय पोलीस अधिकारी विजय लगारे यांच्याशी चर्चा करून हे प्रकरण जलदगती न्यायालयात चालवावे व उज्ज्वल निकम यांची सरकारी वकील म्हणून नियुक्ती करावी, अशी मागणी केली.

दरम्यान, बीड सराफ असोसिएशनचे अध्यक्ष मंगेश लोळगे व सोनार समाजाचे अध्यक्ष विजय कुल्थे, मराठवाडा सराफ सुवर्णकार फेडरेशनचे उपाध्यक्ष सुधाकर दहिवाळ, महाराष्ट्र राज्य सराफ सुवर्णकार फेडरेशनचे सल्लागार गणेश बागडे, अखिल भारतीय सराफ व सुवर्णकार युवा संघटनेचे कैलास मैड, हनुमंत डहाळे यांनी शिरूर कासार येथे जाऊन पोलीस अधिकाऱ्यांना भेटून या प्रकरणाची सखोल चौकशी व तपास करण्याची मागणी केली होती.

समाजसेवेचा बुरखा फाटला

या घटनेच्या आधी खून प्रकरणातील आरोपी ज्ञानेश्वर गायकवाड याने एका सामाजिक संघटनेचे पद मिळवले होते. त्या माध्यमातून त्याने आपण समाजसुधारक असल्याचा आव आणला होता. पोलिसांशी संबंध निर्माण व्हावेत, म्हणून पोलिसांना मास्क, सॅनिटायझर, आदीचे वाटप केले होते. मात्र, या खून प्रकरणाने त्याचा समाजसेवेचा बुरखा पुरता फाटला आहे.

===Photopath===

230521\vijaykumar gadekar_img-20210523-wa0061_14.jpg

===Caption===

सराफा व्यापारी विशाल कुल्थे याचा मृतदेह  भातुकवडगाव येथून आणल्यानंतर शिरूर कासार येथे अशी गर्दी झली होती.