लोकमत न्यूज नेटवर्क
बीड : दारू पिऊन आईला शिवीगाळ करीत सतत मारहाण करणार्‍या पित्यावर मुलानेच कोयत्याने सपासप वार करून खून केला. ही खळबळजनक घटना बीड तालुक्यातील पिंपळनेर परिसरातील शेतात सोमवारी (दि. २४) रात्री घडली. पोलिसांनी आरोपी मुलास ताब्यात घेतले आहे.
श्रीकिसन अंबादास तागड (वय ६०, रा.पिंपळनेर, ता.बीड) असे मयताचे नाव आहे. श्रीकिसन हा दारू पिऊन सतत आईशी घरी वाद घालायचा. तिला शिवीगाळ करायचा. या रागातून मुलगा लहू श्रीकिसन तागड याने सोमवारी रात्री शेतात वडील एकटे असल्याचा फायदा घेत कोयत्याने त्यांच्यावर कोयत्याने सपासप वार करीत खून केला. घटनेची माहिती मिळताच पिंपळनेर पोलीस ठाण्याचे सहायक पोलीस निरीक्षक शरद भुतेकर, पोलीस उपनिरीक्षक ज्ञानेश्वर सानप, सुरवसे, वायकर यांनी घटनास्थळी धाव घेतली. मृतदेह ताब्यात घेत शवविच्छेदनासाठी जिल्हा रुग्णालयात पाठवला आहे.
आरोपी मुलास पोलिसांनी ताब्यात घेतले असून, पिंपळनेर पोलीस ठाण्यात मयताचे भाऊ रोहिदास अंबादास तागड यांच्या फिर्यादीवरून गुन्हा दाखल करण्यात आला आहे. पुढील तपास पिंपळनेर पोलीस ठाणेप्रमुख सहायक पोलीस निरीक्षक शरद भुतेकर करीत आहेत.
बैलाने मारल्याचा केला होता बनाव
वडिलांच्या सतत त्रास देण्याच्या रागातून मुलगा लहू याने सोमवारी रात्री खून केला. घरच्यांना ही माहिती मिळाल्यानंतर घटना लपवण्यासाठी रात्रीच अंत्यविधी करण्याचा निर्णय घेतला होता. मात्र, विरोध झाल्याने जिल्हा रुग्णालयात बैलाने मारल्याचा बनाव करून दाखल करण्यात आले. मृत्यू संशयास्पद असल्याने याची माहिती सहायक पोलीस निरीक्षक भुतेकर यांना देण्यात आली. त्यांनी जिल्हा रुग्णालयात येत मृतदेहाची पाहणी केली असता हा खून असल्याचे आढळून आले. विचारपूस केली तर रागाच्या भरात खून केल्याची कबुली आरोपीने दिली. त्यानंतर गुन्हा दाखल करण्यात आला, अशी माहिती पोलिसांनी दिली.
===Photopath===
250521\25_2_bed_14_25052021_14.jpeg
===Caption===
पिपळनेर येथील शेतात खून झालेल्या ठिकाणी पाहणी करताना पिंपळनेर पोलसी अधिकारी कर्मचारी