२२ लाख रुपयांचा लोकसहभाग : धर्मेवाडीत उभारले मंगल कार्यालय
माजलगाव : तालुक्यातील धर्मेवाडी गावातील ग्रामस्थांनी शेतीच्या नुकसानीचे मिळालेले अनुदान गावाच्या विकासासाठी दिले असून तब्बल २२ लाख रुपयांचा लोकसहभाग जमा करत गावातच अद्ययावत मंगल कार्यालय उभारले आहे. गावातील लग्न सोहळा, मंगल कार्यक्रम, सप्ताह व इतर सार्वजनिक कार्यासाठी या मंगल कार्यालयाचा उपयोग करण्यात येणार आहे. धर्मेवाडी ग्रामस्थांच्या या विधायक कामाची तालुक्यात चर्चा सुरू आहे.
तालुक्यातील धर्मेवाडी हे ५०० लोकसंख्येचे गाव. गावामध्ये पूर्वीपासूनच सामाजिक एकोप्याचे वातावरण. गावात विवाहयोग्य मुला-मुलींच्या लग्नासाठी शहरामध्ये मंगल कार्यालय भाड्याने घ्यावे लागत असे. यासाठी मोठा खर्च वधूपित्यास करावा लागत होता. यावर मात करण्यासाठी सर्व ग्रामस्थांनी पुढाकार घेतला. शासनाकडून शेतीच्या नुकसान भरपाईपोटी आलेले १४ लाख रुपये व त्यामध्ये गावकऱ्यांनी अधिकची रक्कम जमा करीत आणखी ८ लाख रुपयांच्या लोकसहभागातून अद्ययावत मंगल कार्यालय उभारले आहे.
एकीकडे दिवसेंदिवस शेतीव्यवसाय अडचणींचा ठरत आहे. त्यातच निसर्गाच्या लहरीपणामुळे कधी अतिवृष्टी तर कधी दुष्काळ अशा परिस्थितीचा सामना या शेतकऱ्यांना करावा लागतो. तरीदेखील गावाचा विकास झाला पाहिजे, ही प्रत्येक ग्रामस्थाची भावना होती. शासनाच्या स्वच्छता अभियानास प्रतिसाद देत गावामध्ये स्वच्छता करण्यात आली आहे. तर फळांची शंभर झाडे याठिकाणी लावण्यात आली आहेत. दरम्यान, गावातील विवाह व इतर धार्मिक कार्यक्रमासाठी हे मंगल कार्यालय धर्मेवाडीच्या ग्रामस्थांना उपलब्ध होणार आहे.
जेमतेम पाचशे लोकसंख्या असलेल्या गावात शासनाच्या योजना अत्यल्पच राबविल्या गेल्या. गावाचा विकास झाला पाहिजे. या ध्येयाने प्रेरित होऊन युवक, शेतकरी, कष्टकऱ्यांनी एकत्र येत मोठ्या प्रमाणावर लोकसहभाग जमा करीत आज एक आदर्श निर्माण केला आहे.
धर्मेवाडीमध्ये मंगल कार्यालय उभारणी, स्वच्छता अभियान, वृक्षलागवड यासह विविध विकासकामे प्राधान्याने मार्गी लागावीत यासाठी ग्रामस्थांना वेळोवेळी एकत्रित आणण्याबरोबरच त्यांच्यामध्ये समन्वय साधल्यामुळे आज ही कामे मार्गी लागली आहेत.
- पांडुरंग चांडक, ग्रामस्थ.
अद्यायावत उभारण्यात आलेल्या या मंगल कार्यालयाचा लोकार्पण सोहळा बुधवारी पार पडला तर श्री संत माऊली मंदिराचे भूमिपूजन गुरुवारी करण्यात आले. यानिमित्त निवृत्ती महाराज इंदुरीकर यांच्या कीर्तनाचे आयोजन करण्यात आले होते. तसेच गावकऱ्यांसाठी आरोग्य शिबिराचे आयोजन करण्यात आले.