केज : तालुक्यातील पिंपळगाव घोळवे येथील एका विवाहितेला गाडी घेण्यासाठी माहेरहून पैसे घेऊन ये म्हणून सासरच्या मंडळींनी शारीरिक व मानसिक त्रास दिला. या त्रासाला कंटाळून विवाहितेने विष प्राशन करून आत्महत्या केली. याप्रकरणी केज पोलीस ठाण्यात पतीसह सासरच्या मंडळीविरुद्ध गुन्हा दाखल करण्यात आला आहे.
शोभा रामहरी गायकवाड (वय ३०) या विवाहित महिलेस २२ एप्रिल रोजी सकाळी १० वाजेच्या सुमारास तिच्या सासरच्यांनी माहेरहून गाडी घेण्यासाठी पैसे घेऊन ये म्हणून मारहाण केली. हा छळ मागील काही दिवसांपासून सतत सुरू होता. या त्रासाला कंटाळून शोभा हिने विषारी औषध प्राशन केले असता तिला उपचासाठी अंबाजोगाई येथील सरकारी रुग्णालयात दाखल करण्यात आले होते. त्याठिकाणी उपचार सुरू असताना शोभा हिचा मृत्यू झाला. याप्रकरणी मयत शोभा गायकवाडची आई तारामती कोंडीराम भुसारे यांच्या फिर्यादीवरून केज पोलीस ठाण्यात शोभा हिला आत्महत्येस प्रवृत्त केल्याप्रकरणी मयत शोभाचा नवरा रामहरी बालू गायकवाड, सासरा बालू रावसाहेब गायकवाड, दीर किशोर बालू गायकवाड, हिंमत बालू गायकवाड, जाऊ सविता गायकवाड, नणंद लता गणेश कुटे या सहा जणांविरुद्ध गुन्हा दाखल करण्यात आला आहे. या प्रकरणाचा तपास पोलीस उपनिरीक्षक श्रीराम गायकवाड करीत आहेत.