जम्बो कोविड सेंटरमध्ये रेमडेसिविरचा तत्काळ पुरवठा करा

अंबाजोगाई : अंबाजोगाई शहराजवळ लोखंडी सावरगाव येथे असलेल्या जम्बो कोविड सेंटरमध्ये गेल्या चार दिवसांपासून रेमडेसिविर इंजेक्शनचा तुटवडा जाणवत असून, त्याचा पुरवठा तत्काळ करण्याची मागणी आ. नमिता मुंदडा यांनी विभागीय आयुक्तांकडे केली आहे. लोखंडी सावरगाव येथील जम्बो कोविड सेंटरमध्ये दोन कोविड रुग्णालये आहेत. या रुग्णालयांत जवळपास ७०० रुग्ण दाखल आहेत. त्यापैकी बरेच रुग्ण अत्यवस्थेत आहेत. अशा रुग्णांना रेमडेसिविर इंजेक्शनची अत्यंत आवश्यकता आहे. परंतु गेल्या चार ते पाच दिवसांपासून या दोन्ही रुग्णालयात रेमडेसिविर इंजेक्शन उपलब्ध नाहीत. प्रशासनाने जिल्हा शल्यचिकित्सकांकडे सातत्याने मागणी करुनही त्यांनी गेल्या चार ते पाच दिवसात रेमडेसिविर इंजेक्शनचा पुरवठा केला नाही. त्यामुळे गंभीर रुग्णावर उपचार करतांना अडचणी निर्माण होत आहेत. या दोन्ही रुग्णालयात ७ ते २५ सीटी स्कोअर असणारी रुग्ण संख्या मोठ्या प्रमाणात असतानाही रेमडेसिविर इंजेक्शनचा पुरवठा करण्यासाठी टाळाटाळ होत आहे. त्यामुळे आवश्यकता असणाऱ्या रुग्णांना चार दिवसांपासून इंजेक्शनचे डोस देता आले नाहीत. लोखंडी सावरगाव येथील दोन्ही कोविड रुग्णालयातील दाखल कोविड रुग्णांची संख्या पाहता त्वरित रेमडेसिविर इंजेक्शन उपलब्ध करून देण्याबाबत आदेश द्यावेत, अशी मागणी आ. नमिता अक्षय मुंदडा यांनी केली आहे. याबाबतचे पत्र जिल्हाधिकारी, मुख्य कार्यकारी अधिकारी, जिल्हा परिषद, बीड, उपसंचालक, आरोग्य सेवा मंडळ, लातूर आणि जिल्हा शल्यचिकित्सकांनाही देण्यात आले आहे.