बीड : मराठा आरक्षणासाठी काढण्यात येत असलेल्या आमदार विनायक मेटे यांच्या मोर्चास का विरोध करतो? समाज माध्यमावर का लिखाण करतो? असे म्हणत येथील गणेश आसाराम बजगुडे (३५, रा. खडकपुरा, पेठ बीड) यांना धक्काबुक्की करीत जिवे मारण्याची धमकी देण्यात आली.
यासंदर्भात १ जून रोजी सायंकाळी सहाच्या सुमारास बजगुडे यांनी पेठ बीड पोलीस ठाण्यामध्ये तक्रार नोंदवली आहे. तक्रारीत म्हटले आहे की, सायंकाळी सहा वाजेच्या सुमारास खडकपुरा येथील माझ्या घरासमोर असताना दोन दुचाकीवरून चौघे आले. आम्ही आमदार विनायक मेटे यांचे कार्यकर्ते आहोत. तू मेटे साहेबांच्या मोर्चाला का विरोध करतोस? समाजमाध्यमांवरही तू माेर्चाच्या विरोधात लिखाण करीत आहे, असे म्हणत त्यांनी शिवीगाळ केली अन् लाथाबुक्क्यांनी मारहाण केली. तसेच जिवे मारण्याची धमकी देखील दिली. बजगुडे यांनी आ. मेटे यांच्या शिवसंग्राममध्ये निवडणूक काळात प्रवेश केला होता आणि काही महिन्यांतच ते बाहेर पडले होते.
मला कल्पना नाही
यासंदर्भात आमदार विनायक मेटे यांच्याशी संपर्क साधला असता, या घटनेसंदर्भात मला काहीही माहिती नाही. आज दिवसभर मी गेवराई, माजलगाव, परळी आदी भागांत मोर्चासंदर्भात जनसंपर्क करीत होतो, असे त्यांनी सांगितले.