परळी : तालुक्यात शेतकऱ्यांनी खरीप पेरणीपूर्वीच्या मशागतीसह नांगरणे, मोगडणे, उन्हाळी पाळी घालणे, वेचणे ही कामे केली आहेत. चांगला भाव मिळत असल्याने शेतकरी सोयाबीनकडे वळले आहेत. सोयाबीनचे २९ हजार ३४७ हेक्टर क्षेत्रावर अपेक्षित पेरणी धरून तालुका कृषी कार्यालयाने नियोजन केले आहे.
गेल्यावर्षी सोयाबीन उगवणीबाबत शेतकऱ्यांच्या तक्रारी प्राप्त झाल्याने या हंगामात परळी तालुका कृषी कार्यालयाच्या वतीने ३८ गावांत जाऊन घरचे बियाणे पेरणीसाठी व बीज प्रक्रिया करण्याबाबत कृषी अधिकाऱ्यांनी प्रात्यक्षिके करून दाखविली आहेत. परळी तालुक्यात एकूण लागवड क्षेत्र ६८ हजार १६३ हेक्टर असून, त्यापैकी खरीप हंगामात पेरणीसाठी ५५ हजार हेक्टर क्षेत्र उपलब्ध होईल.
सन २०२१-२२ मध्ये परळी तालुक्यात सोयाबीनचे २९ हजार ३०० हेक्टर क्षेत्र अपेक्षित आहे. गेल्या वर्षी सोयाबीनचे २५ हजार ९४० हेक्टर क्षेत्र लागवडीसाठी होते. यंदा कापसाचे अपेक्षित क्षेत्र १४ हजार हेक्टर एवढे आहे. गेल्यावेळी १९ हजार ८७६ हेक्टर क्षेत्र होते. तसेच यंदा खरीप ज्वारीचे बाराशे हेक्टर क्षेत्र अपेक्षित आहे. मूग १२०० हेक्टर , तूर ४ हजार हेक्टर, तर बाजरीचा ९०० हेक्टर क्षेत्रात पेरा अपेक्षित आहे. तसेच सोयाबीन, कापूस, तूर, मूग या पिकांचा मुख्य पेरा असेल. परळी तालुक्यात गेल्या वर्षीच्या तुलनेत यंदा ज्वारी, मूग, तूर, बाजरी, सोयाबीन या पिकांचे लागवड क्षेत्र वाढ करण्याच्या दृष्टीने तालुका कृषी कार्यालयाच्या वतीने नियोजन केले आहे.
कापूस पिकाखालील क्षेत्र हे ऊस लागवडीसाठी वाढल्यामुळे कापूस क्षेत्रात यावेळी घट होण्याची शक्यता आहे. सोयाबीन व तूर, मुगाचे क्षेत्र वाढण्याची शक्यता आहे. शेतकऱ्यांना बियाणे उगवणे बाबतीत गावागावांत जाऊन मार्गदर्शन करण्यात आले तसेच बोगस बी-बियाणे याबाबत भरारी पथके नेमण्यात आली आहेत. - अशोक सोनवणे तालुका कृषी अधिकारी परळी
परळी तालुक्यात शेतकऱ्यांनी शेतात नांगरणी, मोगडणे, मशागतीची सर्व पेरणीपूर्वीची कामे चालू असून, अंतिम टप्प्यात आहेत. - मनोज यस्के, शेतकरी, नागापूर.