लोकमत न्यूज नेटवर्क
अंबेजोगाई : हवामान खात्याच्या अंदाजानुसार या वर्षी सर्वत्र चांगला पाऊस कोसळण्याचा अंदाज वर्तविला आहे, तर काही भागांत अतिवृष्टीचा इशारा दिल्याने नागरिकांनी छत्री खरेदीसाठी दुकांनात धाव घेतल्याचे दिसत आहे. त्यातच पावसाने अंबेजोगाई व परिसरात जोरदार सलामी दिल्याने, ग्रामीण भागातील ग्रामस्थांची शहरात खरेदीसाठी गर्दी होत आहे. या वर्षी छत्र्या महागल्यामुळे ग्राहकांच्या खिशाला चांगलीच आर्थिक झळ बसू लागली आहे.
अंबेजोगाईच्या बाजारपेठेत १०० रुपयांपासून ५०० रुपयांपर्यंत छत्रीचे भाव आहेत. काही ग्राहक किंमत कमी करण्यासाठी दुकानदारांशी घासाघीस करताना दिसत आहेत. तीन फोल्डपासून ते लांब दांड्यांच्या रंगीबेरंगी विविध आकारांतील आणि आकर्षक डिझाइन असलेल्या छत्र्यांनी दुकाने सज्ज झाली आहेत. जूनच्या पहिल्या आणि दुसऱ्या आठवड्यात शालेय वस्तू, प्लास्टीक कापड, रेनकोट आणि छत्र्या खरेदीसाठी गर्दी होत असते. मात्र, अद्याप शाळा बंदच असल्यामुळे शालेय वस्तू खरेदीसाठी कमी गर्दी दिसत आहे. मात्र, बच्चे कंपनी नव्या छत्रीसाठी हट्ट करताना दिसत आहेत.
दुकानांमध्ये विक्रीसाठी विविध प्रकारच्या छत्र्या आल्या असून, लहान मुलांच्या छत्र्यांमध्ये विविध आकार उपलब्ध आहेत. या छत्र्यांवर कार्टून, विविध प्राण्यांचे फोटो, चित्रे असून, त्या लहान मुलांचे लक्ष वेधून घेत आहेत. लहान मुलांच्या छत्र्यांमध्ये लांब दांड्याच्या आणि कलरफुल छत्र्यांना जास्त मागणी आहे. लेडीज छत्रीत वेगवेगळे प्रकार खूप आहेत. तीन व चार फोल्डच्या छत्र्याही बाजारात आल्या आहेत. मात्र, ग्रामीण भागातील जोरदार पाऊस आणि वाऱ्यांमुळे त्या टिकत नसल्याने त्यांना फारशी मागणी नाही.
....
मजबूत छत्र्यांना पसंती
लोखंडी लांब दांड्याच्या छत्र्या काहीशा महाग आहेत. १५० ते २५० रुपये त्यासाठी मोजावे लागत आहेत. मात्र, त्या मजबूत असल्याने त्यांना पसंती मिळत आहे. महिलांसाठी तीन फोल्ड ११० ते १५० रुपये, डबल कोटिंग १०० ते २०० रुपये, लहान ८० ते १५० रुपये, फोल्डिंग छत्री २५० ते ३०० रुपये, लांब दांडी १०० ते २०० रुपयांपर्यंत मिळत आहेत.