बीड : केंद्रीय मंत्र्यांनी डिसेंबर अखेरपर्यंत कोरोना लसीकरण पूर्ण होईल, असा दावा केला आहे. परंतु, जिल्ह्यात सध्या लसीकरण अतिशय संथगतीने सुरू आहे. त्यामुळे डिसेंबरपर्यंत संपूर्ण लसीकरण करणे तर अवघडच आहे, परंतु, २०२२ संपेपर्यंत पूर्ण झाले तरी मिळविले, अशी म्हणण्याची वेळ आहे. हे आव्हान वेळेत पूर्ण करण्यासाठी लसीचा मुबलक साठा उपलब्ध करून देण्याची गरज आहे.
जिल्ह्याची लोकसंख्या ३१ लाखांवर आहे. त्यात १८ ते ४४ वयोगटांतील लोकांची संख्या १२ लाख ९४ हजार एवढी आहे तर त्यापुढील ८ लाख १९ हजार ५३३ एवढी आहे. लसीकरणासाठी एवढे लोक पात्र असतानाही आतापर्यंत केवळ ३ लाख ८५ हजार लोकांना लस टोचण्यात आली आहे. त्यात दोन्ही डोस घेतलेल्यांचा आकडा केवळ ९१ हजार ७१६ एवढा आहे. मागील काही दिवसांपासून तर १८ ते ४४ वयोगटांतील लसीकरण थांबवलेले आहे. केवळ ४५ वर्षांवरील लोकांना लस दिली जात आहे. केवळ लसीचा मुबलक पुरवठा होत नसल्याने जिल्हास्तरावर लसीकरण संथगतीने सुरू आहे. एकीकडे लसीचा तुटवडा असल्याने लसीकरण संथ होत आहे तर दुसऱ्या बाजूला केंद्रीय मंत्र्यांनी डिसेंबर अखेरपर्यंत लसीकरण पूर्ण केले जाईल, असे स्पष्ट केले आहे. अशीच जर गती राहिली तर डिसेंबरअखेर तर सोडाच परंतु २०२२ मध्ये जरी लसीकरण पूर्ण झाले तरी आरोग्य विभागाचे यश समजावे लागेल.
दरम्यान, ४५ वर्षांवरी लोकांना केंद्राकडून तर १८ ते ४४ वयोगटांतील लाेकांना राज्यस्तरावरून लस पुरविली जाते परंतु राज्यस्तरावरून लस मिळत नसल्याने हे लसीकरण बंद आहे. त्यामुळे या गटातून तीव्र संताप व्यक्त होत आहे. लसीकरण वेळेत पूर्ण झाले नाही तर कोरोनाच्या तिसऱ्या लाटेचा मोठा फटका बसण्याची शक्यता वर्तविली जात आहे. त्यामुळे लस उपलब्ध करून लवकरात लवकर लसीकरण पूर्ण करण्याची मागणी होत आहे.
अगोदर १४३ केंद्र, आता ७१
जिल्ह्यात १८ वर्षांवरील लोकांना लस दिली जात होती, तेव्हा गर्दी टाळण्यासाठी उपकेंद्र ते जिल्हा रुग्णालय अशी तब्बल १४३ केंद्रे तयार केली होती परंतु, आता लस उपलब्ध होत नसल्याने केवळ ७१ केंद्र ठेवले आहेत. त्यातही काहीच केंद्र पूर्णवेळ सुरू राहतात, असे सूत्रांकडून सांगण्यात आले.
--
१८ ते ४४ वयोगटांतील लसीकरण बंद आहे. ४५ वर्षांवरील लोकांना ऑनलाईन नोंदणी करून लस दिली जात आहे. शासनाकडून जसी लस उपलब्ध होईल, तसे लसीकरण केले जात आहे.
- डॉ. आर. बी. पवार, जिल्हा आरोग्य अधिकारी, बीड
---
आतापर्यंत झालेले लसीकरण
पहिला डोस २,९४,१८३
दुसरा डोस ९१,७१६
एकूण लसीकरण ३,८५,८९९