अंबाजोगाई : बीड, उस्मानाबाद आणि लातूर जिल्ह्यातील बहुतांशी भागाचा प्रमुख जलस्रोत असणारा मांजरा प्रकल्प २१ सप्टेंबर रोजी दुपारी तुडुंब भरल्याने कालव्यातून पाण्याचा विसर्ग सुरू करण्यात आला होता. मात्र दुपारनंतर झालेल्या मुसळधार पावसाने धरणात पाण्याची मोठ्या प्रमाणात आवक सुरू झाली. त्यामुळे २२ सप्टेंबर रोजी सकाळी ६ वाजता धरणाचे सहा दरवाजे उघडण्यात आले होते. २३ सप्टेंबर रोजी मांजरा धरणात नदीपात्राद्वारे येणाऱ्या पाण्याचा प्रवाह कमी झाल्यामुळे चार दरवाजे बंद करण्यात आले असून दरवाजा क्र. १ आणि ६ हे २५ सेंमी उघडण्यात आले आहेत.
मांजरा धरणाची साठवण क्षमता २२४ दलघमी आहे. बुधवारी सकाळपर्यंत या धरणात २२३.६२५ दलघमी साठा होता. त्यानंतर धरण पूर्ण क्षमतेने भरल्याने मंगळवारी उजव्या कालव्यातून १.२७ प्रति से.घ.मी. वेगाने पाण्याचा विसर्ग सुरू करण्यात आला होता, तर दुपारनंतर मुसळधार पाऊस झाल्याने धरणात पाण्याची आवक वेगाने वाढली. बुधवारी पहाटेपर्यंत धरणात २२५.५ दलघमी पाणीसाठा झाला. त्यामुळे सकाळी ६ धरणांचे सहा दरवाजे उघडण्यात आले. प्रति सेकंद १४९.८० घनमीटर वेगाने पाण्याचा विसर्ग नदीपात्रात सोडण्यात आला होता. सहा वर्षांच्या दुष्काळानंतर २०१६ साली झालेल्या मुसळधार पावसाने या धरणाचे धरणाचे दरवाजे उघडण्याचा योग आला होता. त्यानंतर अपवाद वगळता नियमितपणे हे धरण प्रतिवर्षी पूर्ण क्षमतेने भरत आहे. यंदाही निसर्गाने भरभरून दान दिल्यामुळे सलग तिसऱ्या वर्षी हे धरण तुडुंब भरले असून दरवाजे सलग तिसऱ्या वर्षीही उघडण्याचा सुखावह प्रसंग अनुभवण्यास मिळाला आहे. या विभागातील सिंचन आणि पिण्याच्या पाण्याचा प्रश्न मिटला आहे.
230921\1642-img-20210923-wa0112.jpg
मांजरा दोन दरवाजा मधून विसर्ग