बीड : येथील जिल्हा मध्यवर्ती सहकारी बँक संचालक मंडळाच्या निवडणुकीत सेवा सोसायटी मतदार संघातून उमेदवारांचे ८३ अर्ज अपात्र ठरल्यानंतर त्यांनी लातूर येथील विभागीय सहनिबंधकांकडे धाव घेतली आहे. गुरुवारी ७३ अर्जदारांच्या अर्जांवर दोन्ही बाजूने सुनावणी सुरू होती. विभागीय सहनिबंधकांच्या निर्णयाकडे लक्ष लागले आहे.
बीड जिल्हा मध्यवर्ती सहकारी बँकेच्या निवडणुकीत सेवा सोसायटी मतदार संघातून ८३ उमेदवारी अर्ज दाखल झाले हाेते. अर्ज छाननीत निवडणूक निर्णय अधिकाऱ्यांनी संबंधित उमेदवारांच्या साेसायटींचा ऑडिट वर्ग अ व ब नसल्याने उपविधीचे अनुपालन करीत उमेदवारांचे अर्ज अपात्र ठरवले होते. त्यामुळे जिल्हा बँकेची निवडणूक चर्चेत आली. सेवा सोसायटी मतदार संघातून सर्वच तालुक्यातून उमेदवारी अर्ज अपात्र ठरल्याने ११ जागांबाबत पेच निर्माण झालेला आहे. निवडणूक निर्णय अधिकाऱ्यांच्या निर्णयाला संबंधित उमेदवारांनी विभागीय सहनिबंधक, लातूर यांच्या न्यायालयात दाद मागितली.
विभागीय सहनिबंधक, लातूर श्रीकांत देशमुख यांच्या न्यायालयात अपील दाखल केलेल्या संबंधित ७३ उमेदवारांनी त्यांच्या वकिलांमार्फत बाजू मांडली. सहकार मंत्र्यांनी दिलेल्या निर्णयाचा संदर्भ देत युक्तिवाद केला. १३ मे २०१५ रोजी सहकार मंत्र्यांनी दिलेला स्थगितीचा निर्णय कायम गृहीत धरावा, अशी मागणी या उमेदवारांच्या वतीने करण्यात आली.
तर निवडणूक अधिकाऱ्यांनी अपात्र ठरविलेला निर्णय कायम ठेवत उमेदवारांचे अपील फेटाळून लावण्याची मागणी आक्षेपार्थी अरूण वाघमारे, पुष्पा तिरोडमल, श्रीराम अरगडे यांच्या वतीने करण्यात आली. त्यांच्या वतीने ॲड. संजय देशमुख यांनी काम पाहिले. गुरुवारी दोन्ही पक्षांच्या वतीने बाजू मांडण्यात आली. आता विभागीय सहनिबंधक कोणता निर्णय देतात, याकडे लक्ष लागले आहे.
-------
सन २०१५ मध्ये धनराज राजाभाऊ मुंडे यांनी अपील दाखल करून बँकेच्या ३५ (५) उपविधीतील सेवा सोसायटीच्या लेखा परीक्षण दर्जाबाबतच्या तरतुदीला स्थगिती मागितली होती. तत्कालीन सहकार मंत्र्यांनी स्थगिती दिली होती. त्यानंतर निवडणूक झाली होती. हा स्थगिती आदेश कायम समजला जातो की, नाही याबाबत निर्णयाची प्रतीक्षा आहे. ७ मार्चपर्यंत विभागीय सहनिबंधकांचा निर्णय अपेक्षित आहे.
-------
दरम्यान, जिल्हा बँकेच्या निवडणुकीत १० मार्चपर्यंत नामनिर्देशपत्र मागे घेता येणार आहेत. तर १२ मार्च रोजी उमेदवारांना निवडणूक चिन्हांचे वाटप होऊन यादी प्रसिद्ध होणार आहे.
--------------