माजलगाव : दोन आठवड्यांपूर्वी मुंबईतील बेस्टला सेवा देण्यासाठी माजलगाव आगारातील २२ चालक, वाहक पाठवले होते. रविवारी माजलगावात आल्यानंतर त्या वाहक-चालकांचा स्वॅब तपासणीसाठी पाठविण्यात आला. परंतु त्याचा अहवाल अद्याप प्रतीक्षेत असताना या आगार व्यवस्थापनाकडून त्या वाहक-चालकांना कर्तव्यावर जाण्याची सक्ती केली जात आहे. एसटी महामंडळाचे हे धोरण माजलगावात कोरोना रुग्णसंख्या वाढण्यास कारणीभूत ठरू शकते, असे चित्र पहावयास मिळत आहे.
माजलगाव आगाराचे वाहक-चालक मुंबईतल्या बेस्ट बसला सेवा देण्यासाठी मागील सहा महिन्यांपासून जात आहेत. पंधरा दिवसाला २२ वाहक-चालक नियुक्ती वेळापत्रकानुसार जातात. त्याचप्रमाणे १० एप्रिल रोजी हे वाहक-चालक गेलेले होते. त्या ठिकाणी कर्तव्य पार पडल्यानंतर ते मुंबई येथून परतले. परत आल्यावर रविवारी त्यांना कोरोनाची टेस्ट करण्यासाठी पाठविले होते. त्याचा अहवाल मंगळवारी येणार होता. मात्र अहवाल येण्यापूर्वीच त्या वाहक-चालकांना नवीन येणाऱ्या आधुनिक बसच्या प्रशिक्षणासाठी पाठविण्यात आले. कोरोना महामारीचा वाढता प्रादुर्भाव पाहता चाचणीचा अहवाल येईपर्यंत त्यांना होम क्वारंटाईन करणे गरजेचे होते. परंतु तसे न करता येथील आगार प्रमुखांनी त्यांना कार्यावर पाठवले. मुंबईसारख्या शहरात रुग्णांची वाढती संख्या आणि त्या ठिकाणी कर्तव्य करून आलेल्या २२ वाहक - चालकांचा दोन आठवडे त्या ठिकाणी झालेला वावर यामुळे दुर्दैवाने त्यामधील अनेक जण कोरोना पॉझिटिव्ह निघू शकतात.
धाेरणच ठरेल कारण
दरम्यान, मंगळवारी सकाळपासून नवीन येणाऱ्या शिवशाही बसच्या प्रशिक्षणासाठी मुंबईहून आलेल्या २२ वाहक, चालकांसोबत इतर १६ वाहक, चालक प्रशिक्षण घेत आहेत. यातील बावीस चालक-वाहकांच्या कोरोना अहवालाची प्रतीक्षा न पाहता माजलगाव आगाराचा कारभार महामारी वाढण्यास कारणीभूत ठरणार असल्याचे दिसून येत आहे.
आम्हाला कुटुंबाची भीती
आम्ही मुंबईहून बेस्टचे कर्तव्य बजावून आलो असून, आम्ही कोरोना टेस्ट केलेली आहे. त्याचा अहवाल येण्यापूर्वीच आम्हाला प्रशिक्षणाला पाठविण्यात येत आहे. आम्ही प्रशिक्षणाला जाणार असून, आमच्यामुळे बाहेरील नागरिकांची व आमच्या कुटुंबातील सदस्यांची आम्हाला भीती वाटत असल्याचे हे वाहक - चालक सांगत होते. या वेळी त्यांच्या चेहऱ्यावर भीतीचे वातावरण दिसत होते.
त्या चालक-वाहकांचा रिपोर्ट निगेटिव्हच
मुंबईवरून बेस्टचे कर्तव्य बजावून आलेल्या त्या २२ वाहक, चालकांची कोरोना चाचणी करण्यात आली होती. कोरोना अहवाल अद्याप हातात पडला नाही. परंतु आम्ही कोविड सेंटरवरून माहिती घेतली आहे. नमुने पाठविलेले अहवाल निगेटिव्हच असल्याचे समजल्याने आम्ही त्या वाहक, चालकांना शिवशाही प्रशिक्षणासाठी पाठविले आहे.
- दत्तात्रय काळम पाटील, आगार प्रमुख