शासनाचे दुर्लक्ष कारणीभूत
लोकमत न्यूज नेटवर्क
अंबाजोगाई : अंबाजोगाईत एकीकडे पर्यावरणप्रेमी प्लास्टिकमुक्तीसाठी सरसावले असून नदीच्या पात्रात जाऊन प्लास्टिक गोळा करतात. तर, दुसरीकडे शहरात अनेक लहान, मोठे व्यापारी सर्रास प्लास्टिकच्या पिशव्या, कॅरीबॅग यांची विक्री छुप्या पद्धतीने सर्रास सुरू आहे. नगर परिषद प्रशासन प्लास्टिकमुक्तीपासून दूर असल्याने प्लास्टिकचा वापर हमखास सुरूच राहिला आहे.
राज्य सरकारने मार्च २०१८ मध्ये प्लास्टिकबंदीचा आदेश काढल्यानंतर विविध नगर परिषदांनी धडाक्यात कारवाईला सुरुवात केली. या कारवाईच्या भीतीमुळे लोकही प्लास्टिकच्या पिशव्या नेणे टाळू लागले. विक्रेतेही घरून कापडी पिशवी आणण्याचा आग्रह धरू लागले. याचा प्लास्टिक व्यवसायावर मोठा परिणाम झाला. बंदीनंतर काही दिवसांनी सरकारने विशिष्ट प्रकारचे प्लास्टिक बंदीतून वगळल्याने काहीसा संभ्रमही निर्माण झाला. प्लास्टिकबंदीचा आढावा घेतला असता आजही प्लास्टिकबंदीला १०० टक्के यश मिळाल्याचे दिसत नाही. काही भागात नागरिकांनी स्वत:ला शिस्त लावली आहे. पण, कारवाईचे भय संपल्यामुळे प्लास्टिकबंदी केवळ कागदावरच उरली आहे. प्लास्टिक, थर्माकोलच्या वापरात पूर्वीच्या तुलनेत घट झाली. मात्र, ही बंदी पूर्णत: अमलात आली नाही. भाजीबाजार, फळांचे गाडे या ठिकाणी आजही सर्रासपणे कॅरीबॅगचा वापर सुरू आहे.
कारवाई थंडावताच वाढतो वापर
प्लास्टिक पिशव्यांचा अतिवापर हा स्वच्छता, प्रदूषणासह अनेक नागरी समस्यांच्या दृष्टीने आव्हान ठरले होते. पालिका प्रशासनाने कारवाई सुरू केल्यास वापर थांबतो. कारवाई थंडावली की पुन्हा प्लास्टिकचा वापर ‘जैसे थे’ सुरू होतो.
जलस्रोतांना विळखा कायम
अंबाजोगाई शहरात असणा-या जयवंती व वाण नदीत शहरवासीयांनी वापरलेले प्लास्टिक वाहून येते. या नदीत चार-चार थर प्लास्टिकचे झाले आहेत. पर्यावरणप्रेमींनी एकत्रित येऊन जेव्हा प्लास्टिक निर्मूलनाचा उपक्रम हाती घेतला, तेव्हा शेकडो हातही या कामी कमी पडू लागले, अशी स्थिती झाली आहे. जलस्रोतांमध्ये जर प्लास्टिक तसेच राहिले तर भविष्यात पाण्याचे मोठ्या प्रमाणात प्रदूषण राहणार आहे. याचा मोठा फटका मानवी जीवनाला निमूटपणे सहन करावा लागणार आहे.
....
कठोर कारवाई करणार
अंबाजोगाई शहरात प्लास्टिकचा वापर छुप्या पद्धतीने करणा-या व्यापा-यांवर कारवाई केली जाईल. यापूर्वीही नगरपालिका प्रशासनाने वेळोवेळी प्लास्टिकबंदी मोहीम राबविली आहे. आता विशेष पथक नेमण्यात येणार असून बंदी झुगारणा-यांविरुद्ध कठोर कारवाई करण्यात येईल.
- अशोक साबळे,
मुख्याधिकारी, नगर परिषद, अंबाजोगाई