धारूर : कोरोना प्रतिबंधक उपाययोजनेंतर्गत लॉकडाऊनच्या नियमांची कडक अंमलबजावणी करण्यासाठी जिल्हा परिषदेचे उपमुख्य कार्यकारी अधिकारी व पंचायत समितीचे गटविकास अधिकाऱ्यांनी ग्रामीण भागात दौरा करून एकूण १३ दुकानांवर दंडात्मक कारवाई केली तसेच विनाकारण व विनामास्क फिरणाऱ्यांकडूनही दंड वसूल केला.
धारूर तालुक्यामध्ये भोपा, तेलगाव, देवदहिफळ, संगम, मुंगी, फकीर जवळा, चोंरबा अंबेवडगाव या ठिकाणी जिल्हा परिषदेचे, पंचायत विभागाचे उपमुख्य कार्यकारी अधिकारी डी. बी. गिरी तसेच धारूर पंचायत समितीचे गटविकास अधिकारी आर. एस. कांबळे यांनी पथकासह भेट दिली.
तेलगाव येथे कोरोना व लॉकडाऊनच्या नियमांचे उल्लंघन करणाऱ्या नऊ दुकानांवर कारवाई करण्यात आली. प्रत्येकी एक हजार रुपयेप्रमाणे नऊ हजार रुपये दंड वसूल करण्यात आला. अंबेवडगाव येथे तीन दुकानांवर कारवाई करून तीन हजार रुपयांचा दंड वसूल केला, तर चोंराबा येथेही एका दुकानावर कारवाई करत एक हजार रुपयांचा दंड आकारला. एकूण १३ हजार रुपये दंड वसूल करण्यात आला. त्याचबरोबर मास्क न वापरणाऱ्या ग्रामस्थांवर प्रत्येकी पाचशे रुपये याप्रमाणे दंडात्मक कारवाई करण्यात आली. हा आकडा ग्रामपंचायतनिहाय असल्याने समजू शकला नाही. पथकात पंचायत विभागाचे उपमुख्य कार्यकारी अधिकारी डी. बी. गिरी, गटविकास अधिकारी आर. एस. कांबळे, पंचायत विभागाचे विस्तार अधिकारी अनिल चौरे, सीसीचे साहाय्यक अशोक शिंदे, ग्रामसेवक शंकर हेडगिरे आदींचा समावेश होता.
===Photopath===
230521\img-20210522-wa0177_14.jpg