बीड : शहर पोलीस ठाणे हद्दीतील जालना रोड भागातील एसबीआय बँकेच्या ओकेआय या कंपनीच्या एडीडब्ल्यूएम मशीनमधून आयडीएफसी बँक खात्याच्या ग्राहकाने एसबीआयचे ४ लाख ४० हजार ५५० रुपये वळते करून घेतले. हा प्रकार १० जून रोजी घडल्याचे बँकेच्या अधिकाऱ्यांच्या लक्षात आल्यानंतर त्यांनी बीड शहर पोलीस ठाण्यात धाव घेतली. मात्र, गुन्हा दाखल करण्यास तब्बल १० दिवस उशीर लागल्याचे सांगण्यात आले.
ही रक्कम ऑनलाइन वळती करण्याचा प्रकार १० जून रोजी घडला होता. दररोज किती पैसे मशीनमधून निघाले किंवा भरले गेले याची माहिती बँकेकडून घेतली जाते. त्या वेळी मशीनधील पैसे कमी झाल्याचे निदर्शनास आले. मात्र, त्या संबंधित आयडीएफसी बँकेतील ग्राहकाच्या खात्यातून पैसे कपात झाले नव्हते. त्यामुळे ही घटना १४ जून रोजी काहीतरी गडबड असल्याचे बँकेच्या निदर्शनास आले. त्यानंतर जालना रोड एसबीआयचे शाखा व्यवस्थापक आनंदकुमार मेहता यांनी सर्व माहिती घेत त्याच दिवशी बीड शहर पोलीस ठाण्यात गुन्हा दाखल करण्यासाठी धाव घेतली. झालेला प्रकार सांगितला; मात्र, गुन्हा दाखल करण्यासाठी बीड शहर पोलिसांकडून विलंब लावण्यात आला. २४ जून रोजी भादंवि कलम ४२०, ३८०, कलम ६६ (सी), ६६ (डी), आयटी ॲक्टनुसार गुन्हा दाखल करण्यात आला आहे. तपास शहर ठाण्याचे पोलीस निरीक्षक रवी सानप करीत आहेत.
----
हार्डवेअरमध्ये एरर निर्माण करून गुन्हा
जालना रोड परिसरातील एसबीआय बँकेच्या मशीनद्वारे आयडीएफसी बँकेचे खाते क्र. १००६२७८८९८१ व १००६२७२७९१६ व एटीएमचे शेवटचे आकडे ३९८८ तसेच १६७८ वरून एसबीआय कंपनीच्या एडीडब्लूएम मशीनच्या हार्डवेअरमध्ये एरर निर्माण करून अनधिकृत संकेत शब्दांचा किंवा पासवर्डचा किंवा कोणत्याही अनन्यसाधारण ओळखदर्शक वैशिष्ट्याचा लबाडीने व अप्रामाणिकपणे वापर करून संगणक व इतर सदृश्य साधनाने अनधिकृत मार्गाने एसबीआयची ४ लाख ४० हजार ५५० रुपये इतकी रक्कम अनधिकृतपणे ट्रॅन्जेक्शन करून बँकेच्या पैशाचा अपहार करून ऑनलाइन फसवणूक केल्याचे फिर्यादीत म्हटले आहे.
--------
बँकेतील पैसे सर्वसामान्य नागरिकांचे आहेत. त्यासंदर्भात फसवणूक होणे गैर असून, पोलिसांनी या प्रकरणाचा लवकरात लवकर तपास करून आरोपींना ताब्यात घ्यावे.
- आनंदकुमार मेहता, व्यवस्थापक, एसबीआय, जालना रोड शाखा.