वरूड / बेनोडा : तालुक्यात कोरोनाचा दिवसेंदिवस प्रादुर्भाव वाढत आहे. आमदार देवेंद्र भुयार यांनी आरोग्यमंत्र्यांकडे पाठपुरावा करून कोविड रुग्णालयाचे काम युद्धस्तरावर सुरू केले. दोन दिवसांपूर्वी जिल्हाधिकाऱ्यांनी दौरा करून आढावा घेतला. गुरुवारला जिल्हा शल्यचिकित्सक शामसुंदर निकम यांनी बेनोडा येथील आरोग्य केंद्रात जाऊन कोविड रुग्णालयाचा कामाचा आढावा घेतला. १७ मे रोजी रुग्णालय कार्यान्वित करून लोकार्पणाचे आदेश वजा सूचना दिल्या. तातडीने ऑक्सिजन असलेले ५० खाटांचे कोविड रुग्णालय सुरू होत असल्याने परिसरातील रुग्णांना दिलासा मिळणार आहे.
वरूड तालुक्यात कोरोना पॉझिटिव्ह रुग्णांची संख्या वाढल्याने चिंतेचे वातावरण आहे. नागपूर अमरावतीला गंभीर रुग्णांसाठी खाट उपलब्ध होत नसल्याने कोविड रुग्णांसह नातेवाइकांची चांगलीच ससेहोलपट होत आहे. अनेकांनी प्राणसुद्धा गमावले. याकरिता मोर्शी, वरूड मतदारसंघाचे आमदार देवेंद्र भुयार यांनी आरोग्यमंत्री राजेश टोपे यांचेसोबत चर्चा करून तातडीने बेनोडा येथे कोविड रुग्णालय मंजूर करून घेतले आणि प्रत्यक्ष कामाला युद्धस्तरावर सुरुवात करण्यात आली. बेनोडा प्राथमिक आरोग्य केंद्रात ५० खाटांचे रुग्णालय सुरू करण्याच्या हालचाली होऊन मंगळवारी जिल्हाधिकारी शैलेश नवाल यांनी दौरा करून अधिकाऱ्यांना तातडीने काम पूर्ण करण्याच्या सूचना दिल्या. गुरुवारी दुपारी २ वाजता जिल्हा शल्यचिकित्सक शामसुंदर निकम यांनी रुग्णालयाची पाहणी करून कामाबद्दल समाधान व्यक्त केले. १७ मे ला कोविड रुग्णालय कार्यान्वित करून लोकार्पित करावे, असे स्पष्ट आदेश दिल्याने युद्धस्तरावर काम सुरू आहे. नोडल अधिकारी तसेच ग्रामीण रुग्णालयाचे वैद्यकीय अधीक्षक प्रमोद पोतदार, बेनोडा वैद्यकीय अधिकारी सोहेल खान, सहायक नोडल अधिकरी सुधाकर राऊत, आरोग्य सेवक राजेंद्र शेळके, रोशन दारोकर उपस्थित होते. येथे वैद्यकीय अधिकाऱ्यांसह ३१ कर्मचाऱ्यांच्या नियुक्तीला मान्यता देण्यात आली असून, सुसज्ज कोविड रुग्णालयात एक फिजिशियन हृदय रोग तज्ज्ञ , एक एमबीबीएस डॉक्टर, २ बीएएमएस डॉक्टर, ११ एएनएम, ६ सफाई कामगार, १० कक्ष सेवक यांना जिल्हाशल्य चिकित्सकांनी नियुक्त केले आहे. नोडल अधिकरी म्हणून डॉ. प्रमोद पोतदार राहतील. १७ मे रोजी रुग्णालय कार्यान्वित करून लोकार्पणाचे आदेश दिले. ऑक्सिजन असलेल्या ५० खाटांचे कोविड रुग्णालय तातडीने सुरू होत असल्याने परिसरातील रुग्णांना दिलासा मिळणार आहे.