प्रदीप भाकरे
अमरावती : शहरात अलीकडे खुनाची नकोशी हॅटट्रीक नोंदविली गेली. खुनाच्या तीनही घटनांमध्ये चायना चाकू वापरण्यात आला. ते धारदार चाकू ‘ऑनलाईन’ मागविले जातात हे स्पष्ट होताच, पोलीस आयुक्तांनी अशा कंपन्यांवर कटाक्ष रोखला आहे. चायना चाकूची ऑनलाईन विक्री व वितरणाला पायबंद घालण्यासाठी संबंधित कंपन्यांच्या नावे सीआरपीसीच्या कलम १४४ नुसार आदेश पारित केले आहेत. तो आदेश संबंधित कंपन्या व ई-कॉमर्स’ वेबसाईटला ई-मेल केला जाणार आहे.
खून वा खुनाचा प्रयत्न अशा घटनांमध्ये चायना चाकूचा सर्रास वापर केला जात आहे. चायना चाकू हा ‘डोमेस्टिक अप्लायंसेेस’ अर्थात घरगुती वापराचे साहित्य या वर्गवारीत मोडतो. त्यामुळे पोलीस तो चाकू जप्त करूनही शस्त्र अधिनियमाच्या कलम ४/२५ अन्वये गुन्हा नोंदवू शकत नाहीत. त्याचा गैरफायदा घेऊन कुणाला संपविण्यासाठी चायना चाकूचा वापर बिनदिक्कतपणे केला जात आहे. अगदी काही अल्पवयीन मुलेदेखील दहशत निर्माण करण्यासाठी चायना चाकू बाळगत असल्याचे धक्कादायक निरीक्षण पोलिसांनी नोंदविले आहे. मोतीनगर, धाबा व महादेवखोरी येथे दिवसाआड झालेल्या हत्यांमध्ये चायना चाकूनेच सपासप वार करण्यात आले. त्यापार्श्वभूमीवर पोलीस आयुक्त डॉ. आरती सिंह या कमालीच्या गंभीर झाल्या आहेत. १७ ते २५ या वयोगटातील विशिष्ट तरुण चक्क चाकूचा डीपी ठेवून स्वत:चा शिक्का जमविण्याच्या नादात गुन्हेगारीकडे वळल्याो धक्कादायक वास्तव अलीकडच्या घटनांमुळे उघड झाले आहे.
३०० ते ५०० रुपयांमध्ये तीन दिवसात ‘डिलिव्हरी’
वस्तूंची ऑनलाईन विक्री करणाऱ्या काही कंपन्यांचे ॲप डाऊनलोड करून, त्यावर वस्तूंची ऑनलाईन खरेदी करता येते. तीन ते चार दिवसांमध्ये दिलेल्या पत्त्यावर संबंधित कंपनीचे डिलिव्हरी बॉय’ त्या वस्तू ग्राहकांपर्यंत पोहोचवून देतात. २९९, ३८९, ५४४, ६४९, ४९९, ११०० रुपयांपर्यंत हे चायना चाकू ऑनलाईन विक्रीसाठी उपलब्ध आहेत.
काय आहे आदेशात?
९ इंचापेक्षा अधिक लांबी असलेल्या चायना वा अन्य चाकूची विक्री करू नये, जे चाकू ९ इंचापेक्षा कमी लांबीच्या आहे, ते चाकू आतापर्यंत कुणी मागविले, त्यांचे नाव, पत्ता व संपूर्ण लेखाजोखा अमरावती शहर पोलिसांना न चुकता व विनाविलंब पाठवावा, असे आदेश सीआरपीसीच्या कलम १४४ नुसार चायना चाकूची ऑनलाईन विक्री करणाऱ्या विशिष्ट कंपन्यांना देण्यात आले आहेत.
कोट
चायना चाकू विक्री व वितरणाला ब्रेक लावण्यासाठी सीआरपीसीच्या कलम १४४ नुसार आदेश काढले. ते आदेश संबंधित कंपन्यांना ई-मेलने पाठविले जातील.
- डॉ.आरती सिंह,
पोलीस आयुक्त