तीन गंभीर जखमी, जिल्हा सामान्य रुग्णालयात हलविले, चौघेही चांदूर बाजार तालुक्यातील
मोर्शी (अमरावती) : मोर्शी ते चांदूर बाजार मार्गावर आष्टगाव ते वरला दरम्यान दोन दुचाकींच्या धडकेत युवक ठार झाला, तर तिघे गंभीर जखमी झाले. त्यांना जिल्हा सामान्य रुग्णालयात हलविले आहे. २१ सप्टेंबर रोजी सायंकाळी ४ च्या सुमारास ही घटना घडली.
पोलीस सूत्रांनुसार, चांदूर बाजार तालुक्यातील खैरी दोनोडा, येलकीपूर्णा, हिरूळपूर्णा व कुरळपूर्णा येथील चार युवक एमएच २७ एवाय ५८६१ व एमएच २७ सीएफ ६९८१ या क्रमांकाच्या दुचाकींनी मोर्शीला काही कामानिमित्त येत होते. परंतु, अष्टगाव ते वरला या गावादरम्यान त्यांच्या दुचाकींची आपसात धडक होऊन नितीन नामदेवराव नांदणे (२३, रा. कुरळपूर्णा) हा जागीच गतप्राण झाला. अविनाश भानगे (२४, रा. खैरी दानोडा), ऋषीकेश पवार (२३, रा. येलकीपूर्णा) व रोशन नान्हे (२७, रा. हिरूळपूर्णा) हे गंभीररीत्या जखमी होऊन रस्त्यावर पडले होते. याबाबतची माहिती मोर्शी पोलिसांना मिळताच ठाणेदार मोहंडुले यांच्या मार्गदर्शनाखाली पोलिसांची चमू घटनास्थळी दाखल झाली. उपजिल्हा रुग्णालयातील तुषार पोहकर यांची खासगी ॲम्बुलन्सद्वारे मृतासह जखमी युवकांना मोर्शी उपजिल्हा रुग्णालयात आणले. मृत नितीनचा मृतदेह शवागारात ठेवण्यात आला आहे. जखमींवर उपजिल्हा रुग्णालयात प्रथमोपचार केल्यानंतर त्यांना जिल्हा सामान्य रुग्णालयात हलविण्यात आले. मोर्शी पोलीस पुढील तपास करीत आहेत.