दोघे बचावले : रुईच्या गाठी भस्मसातलोकमत न्यूज नेटवर्कअमरावती : धावत्या ट्रकने अकस्मात पेट घेतल्याने ट्रकमधील कापसाच्या गाठी जळून खाक झाल्या. यामध्ये अंदाजे एक लाखाची हानी झाल्याचा प्राथमिक अंदाज आहे. ही घटना वायगाव-आष्टी मार्गावर गुरूवारी ५.३० वाजताच्या दरम्यान घडली. ट्रक क्रमांक एच.आर. ६१ ए.१८३९ वलगाववरून आष्टीकडे निघाला होता. वायगाव फाट्यानजीक अचानक ट्रकमधून धूर निघत असल्याचे ट्रकचालकाच्या लक्षात आले. त्याने लगेच ट्रक थांबविला. परंतु रूईच्या गाठी पेटल्या होत्या. बघताबघता आगीने रौद्ररूप धारण केले. घटनेची माहिती वलगाव पोलीस व अमरावती अग्निशमन दलाला देण्यात आली. बंब पोहोचेपर्यंत ट्रक जळून खाक झाला होता. वलगावचे ठाणेदार गजानन मेहत्रे, रमेश पखाले, राजेश राठोड, काशिनाथ पंधरे, राम बागडे, अतुल संभे यांनी घटनास्थळाची पाहणी केली. ‘द बर्निंग ट्रक’ पाहण्यासाठी बघ्यांनी गर्दी केली होती. ट्रकमध्ये चालकासह आणखी एक जण होता. सुदैवाने प्राणहानी झाली नाही. हा ट्रक कोणत्या जिनिंग प्रेसिंगमधून आला होता, याची माहिती वृत्त लिहेस्तावर मिळू शकली नाही. पुढील तपास ठाणेदार गजानन मेहत्रे करीत आहेत.
वायगावनजीक धावता ट्रक पेटला
By admin | Updated: May 26, 2017 01:38 IST