फोटो पी २० नांदगाव
नांदगाव पेठ : अवैधरीत्या जनावरांना कोंबून नेणाऱ्या व्हॅनला ट्रॅव्हल्सने दिलेल्या जबर धडकेत व्हॅनचा क्लीनर जागीच ठार झाला, तर वाहनांमध्ये असलेल्या आठ गाईंसह दोन गोवंशाचा अपघातात मृत्यू झाला. ही घटना मंगळवारी सकाळी ६.३० च्या दरम्यान रहाटगाव रिंग रोडनजीक घडली. घटनेत व्हॅनचा चालकदेखील गंभीर जखमी असून, त्याच्यावर शासकीय रुग्णालयात उपचार सुरू आहेत. नासीर खान अकबर खान असे अपघातात ठार झालेल्या क्लीनरचे नाव आहे, तर संगम मोहोड हा चालक गंभीर जखमी आहे.
पहाटे साडेसहा वाजताच्या दरम्यान एमएच २७ बीएक्स ४८०६ ही व्हॅन अवैधरीत्या जनावरे घेऊन अमरावतीकडे भरधाव जात असताना, व्हॅनच्या चालकाने रिंग रोडच्या दिशेने वाहन वळविले. त्यामुळे विरुद्ध दिशेने येणाऱ्या ट्रॅव्हल्स (एमएच २० ईएल ८००) ने व्हॅनला जोरदार धडक दिली. दोन्ही वाहने भरधाव असल्याने ट्रॅव्हल्सने दूरपर्यंत व्हॅनला घासत नेले. यामध्ये क्लिनर नासीर खान अकबर खान हा जागीच ठार झाला, तर चालक संगम मोहोड गंभीर जखमी झाला. वाहनांमध्ये कोंबून नेण्यात येत असलेल्या आठ गाई व दोन गोवंशचादेखील अपघातात मृत्यू झाला.
घटनेची माहिती नांदगाव पेठ पोलिसांना कळताच तातडीने पोलीस ताफा घटनास्थळी पोहोचला. जखमी चालकाला तसेच मृताला रुग्णवाहिकेच्या मदतीने जिल्हा सामान्य रुग्णालयात पोहचविले, तर अपघातात मृत जनावरांवर अंत्यसंस्कार करण्यात आले.