अमरावती : जिल्हा परिषद प्राथमिक शिक्षकांच्या बदल्या यंदाही कोरोनामुळे रखडण्याची दाट शक्यता आहे. सलग दुसऱ्यावर्षी बदल्या होणार नसल्याने दुर्गम भागातील बदलीपात्र शिक्षकांमध्ये नाराजीचा सूर उमटत आहे.
यंदा बदलीच्या धोरणात काही प्रमाणात बदल झालेला आहे. त्यामुळे शिक्षकांच्या आशा पल्लवित झाल्या होत्या. पण शासनाने कोरोनाचे कारण देऊन ३० जूनपर्यंत कुठल्याही प्रवर्गाच्या बदल्या करू नयेत, असे आदेश जारी केले आहेत. त्यामुळे सर्वच कर्मचाऱ्यांच्या बदल्यांना तूर्तास ब्रेक लागला आहे. दरवर्षी जिल्हा परिषदेत सर्वाधिक चर्चेत प्राथमिक शिक्षकांच्या बदल्या राहतात. परंतु गत दोन वर्षांपासून शिक्षकांच्या बदल्याच झालेल्या नाहीत. त्यामुळे शिक्षकांचा दुर्गम अर्थात अवघड भागातील सेवा कालावधी वाढून त्यांच्या बदल्यांची प्रक्रिया लांबणार आहे.
बॉक्स
ऑनलाईन पोर्टल
प्राथमिक शिक्षकांच्या बदल्यांसाठी चार वर्षांपूर्वी ऑनलाईन पोर्टल सुरू करण्यात आले होते. त्यानुसार थेट राज्यस्तरावरूनच बदली प्रक्रिया राबविली जात होती. त्याला सुरुवातीला शिक्षक संघटनांचा विरोध झाला. परंतु या प्रक्रियेत मानवी हस्तक्षेप कमी आणि पारदर्शकता अधिक राहत असल्याने शिक्षक संघटनांनी देखील या प्रक्रियेला स्वीकारले. त्यानुसार दोन वर्षे अर्थात २०१७-१८ व २०१८-१९ या वर्षात बदल्या केल्या. गेल्यावर्षी अर्थात २०२० मध्ये बदल्या कोरोनामुळे होऊ शकल्या नाहीत. यंदाही तीच स्थिती आहे.
बॉक़्स
जिल्ह्याची स्थिती...
जिल्ह्यात १४ तालुके आहेत. त्यापैकी बारा तालुके पूर्णत: सपाटीचे आहेत, तर दोन तालुके पूर्णत: दुर्गम आहेत. एका तालुक्याचा काही भाग हा दुर्गम भागात मोडला जातो. अवघड व सोपे क्षेत्र ठरविताना अनेक वादविवाद झाले होते. परिणामी दुर्गम तालुक्यात सेवा करूनही त्यांची ती सेवा दुर्गम भागात ग्राह्य धरली गेली नाही.
बॉक्स
संख्या वाढतच जाणार...
सलग दोन वर्षे बदल्या रखडल्याने दुर्गम भागातील शिक्षकांमध्ये नाराजी, तर सोप्या क्षेत्रातून दुर्गम भागात बदलीपात्र शिक्षकांमध्ये आणखी काही काळ बदली रखडल्याने समाधान व्यक्त होत आहे. बदलीपात्र शिक्षकांची संख्या वाढतच जाणार असून त्यामुळे सोयीचे गाव निवडताना कसरत होईल.
कोट
यंदा सर्व प्रकारच्या बदल्यांना ३० जूनपर्यंत शासनाने स्थगिती दिली आहे. त्यामुळे शिक्षकांच्या बदल्यादेखील होणार नाहीत हे स्पष्ट आहे. आता ऑनलाईन प्रक्रिया असल्यामुळे स्थानिक ठिकाणी त्याबाबत हस्तक्षेप होऊ शकत नाही.
- एजाज खान
प्राथमिक शिक्षणाधिकारी