हरिसाल येथील दीपाली चव्हाण आत्महत्या प्रकरण, परीविक्षाधीन कालावधी संपण्यापूर्वीच गंभीर गुन्हा दाखल
अमरावती : हरिसाल येथील वनपरिक्षेत्राधिकारी दीपाली चव्हाण यांच्या आत्महत्या प्रकरणातील प्रमुख आरोपी असलेला निलंबित उपवनसंरक्षक विनोद शिवकुमार याची आयएफएस नोकरी धोक्यात आली आहे. विनाेद याच्यावर परीविक्षाधीन कालावधी संपण्यापूर्वीच आत्महत्या करण्यास प्रवृत्त करणे, गर्भपात, शिवीगाळ अशा गंभीर स्वरुपाचा गुन्हा दाखल झाला आहे. त्यामुळे अचलपूर न्यायालयात शिवकुमार याने जामीन अर्ज सादर केला असून, आता याकडे लक्ष लागले आहे.
भारतीय वनसेेवा कॅडरमधील उपवनसंरक्षक विनोद शिवकुमार यांची सेवा आहे. मेळघाटात सातत्याने वादग्रस्त असणारे विनोद शिवकुमार याच्या जाचाला कंटाळून दीपाली चव्हाण यांनी २५ मार्च २०२१ रोजी निवासस्थानी आत्महत्या केली होती. मात्र, विनोद शिवकुमार याने मराठी भाषा परीक्षा अद्यापही उत्तीर्ण केली नाही. अशातच परीविक्षाधीन कालावधी संपण्यापूर्वीच गंभीर गुन्हे त्याच्याविरूद्ध दाखल झाले. त्यामुळे विनोद शिवकुमार याची विभागीय चौकशी होण्यापूर्वीच त्याला सेवेतून बाद होऊ केले जाऊ शकते. प्रशासकीय सेवेतील अधिकारी वादग्रस्त अथवा गंभीर गुन्ह्यात सामील असेल तर अशावेळी राज्य घटनेतील तरतुदीनुसार शासनाला संंबंधित अधिकाऱ्याला सेवेतून बडतर्फ करण्याचे अधिकार आहे. त्यानुसार विनाेद शिवकुमार याला केंद्र शासन राष्ट्रपतीच्या मंजुरीनंतर नोकरीतून बडतर्फ करू शकते, अशी माहिती एका ज्येष्ठ अधिकाऱ्यांनी ‘लोकमत’शी बोलताना दिली. विनोद शिवकुमार यांच्याबाबत राज्याच्या वन खात्याचे वनबलप्रमुख पी. साईप्रसाद यांच्याशी संपर्क साधला असता, ते उपलब्ध होऊ शकले नाही.
----------
दीपाली चव्हाण आत्महत्याप्रकरणी दोषारोप पत्र कोर्टात सादर झाले आहे. आता परिस्थितीत आमूलाग्र बदल झाला असून, तपासदेखील पूर्ण झाला आहे. आता आरोपीला कारागृहात ठेवणे अशक्य असते, अशी कायद्याची परिभाषा आहे.
- परीक्षित गणोरकर, सरकारी अभियोक्ता, अमरावती