वरूड : तालुक्यातील ढगा येथील एका २८ वर्षीय महिलेने तिच्या सहा महिन्याच्या मुलीसह इस्माईलपूर शिवारातील एका शेतात विहिरीमध्ये मुलीसह उडी घेऊन जीवनयात्रा संपविली. हृदयाचा थरकाप उडविणारी ही घटना शुक्रवारी उघडकीस आली. आईचा मृतदेह सापडला, मात्र, सहा महिन्याच्या मुलीचा मृतदेहाच पोलिसांचा शोध सुरु होता. अखेर शनिवारी सायंकाळी चार वाजता विहिरीतून मृतदेह बाहेर काढण्यात आला. या हृदय हेलावून टाकणाऱ्या घटनेमुळे ढगा गावात हळहळ व्यक्त करण्यात येत आहे.
पोलीस सूत्रांनुसार, मृत महिलेचे नाव प्रियंका मनोहर धोटे (२८), तर मुलीचे नाव स्वरा आहे. महिला गुरुवारी सायंकाळी ४ वाजता घरून निघून गेली होती. ती परत आली नाही म्हणून कुुटुंबीयांनी शोध घेतला. मात्र, आढळून आली नव्हती. दुसऱ्या दिवशी सकाळी इस्माईलपूर शिवारात जनार्दन घोरमाडे यांचे शेतातील विहिरीत मृतदेह आढळून आल्याने नागरिकांनी घटनास्थळावर एकच गर्दी केली होती. पोलिसांना या घटनेची माहिती मिळताच ठाणेदार प्रदीप चौगावकर यांच्या मार्गदर्शनात उपनिरीक्षक योगेश हिवसे, जमादार उमेश बुटले, दीपक पंधरे, सुमीत तिळेकर यांचे पथक घटनास्थळावर दाखल झाले. महिलेचा मृतदेह विहिरीतून बाहेर काढला. मात्र, तिची मुलगी बेपत्ता होती. तिचा विहिरीत रात्री उशिरापर्यंत शोध घेऊनही मृतदेह सापडला नव्हता.
शनिवारी सकाळपासून पुन्हा विहिरीतील पाणी उपसणे सुरू होते. अखेर सायंकाळी ४ वाजता स्वराचा मृतदेह बाहेर काढण्यात ग्रामस्थांच्या मदतीने पोलिसांना यश आले. बालिकेचा मृतदेह शवविच्छेदनाकरिता ग्रामीण रुग्णालयात आणण्यात आला. यानंतर माय-लेकीवर अंत्यसंस्कार करण्यात आले. याप्रकरणी आत्महत्येचे कारण अद्याप पुढे आलेले नाही. पोलिसांनी आकस्मिक मृत्यूची नोंद केली असून पुढील तपास वरूड पोलीस करीत आहेत.