अमरावती : महापालिकेच्या पशुवैद्यकीय विभागाकडून होत असलेल्या कारवाईला विरोध करीत उपस्थित दोन महिला पोलीस कर्मचाऱ्यांशी झटापट करण्यात आली. शासकीय कामकाजात अडथळा निर्माण करण्यात आला. फ्रेजरपुरा पोलीस ठाण्यांतर्गत येणाऱ्या प्रभू कॉलनी येथे शुक्रवारी सकाळी ७.३० ते ७.४५ च्या सुमारास ही घटना घडली. फ्रेजरपुरा पोलिसांनी शासकीय कामकाजात अडथळा केल्याप्रकरणी कमलेश सुंडेसह अन्य अरोपीविरूद्ध गुन्हा दाखल केला.
प्रभू कॉलनी येथील मोतीचंद सुंडे यांच्या म्हैशीपालनाचा व्यवसाय आहे. ते त्यांच्या म्हशी रस्त्यावर बांधतात. पावसाळ्यात यामुळे परिसरात दुर्गंधी पसरल्याची तक्रार तेथील स्थानिकांनी महापालिकेच्या पशुवैद्यकीय विभागाकडे केली. त्यानुसार, शुक्रवारी सकाळी पशुवैद्यकीय विभागाचे निरीक्षक गुणसागर गवई, स्वास्थ निरीक्षक पंकज कल्याणकर यांचे पथक प्रभू कॉलनीत कारवाईसाठी पोहोचले. त्यावेळी त्यांच्यासमवेत महिला पोलीस कर्मचारीदेखील होत्या. तेथे मोतीचंद सुंडे, एक महिला व कमलेश ऊर्फ कालू संडे यांनी पथकाशी हुज्जत घातली. त्यावेळी त्या दोन महिला पोलिसांशीदेखील झटापट करण्यात आली. याप्रकरणी गुणसागर गवई यांनी दुपारी तक्रार नोंदविली.