अमरावती : विभागात ९ जुलैनंतर पावसाची रिपरिप सुरू झाल्याने खरिपाच्या पेरण्या अंतिम टप्प्यात आल्या आहेत. सद्यस्थितीत ३२,२८,५०० हेक्टर सरासरी क्षेत्राच्या तुलनेत २९,२५,४०० हेक्टर क्षेत्रात पेरणी आटोपली आहे. ही ९१ टक्केवारी आहे. विभागातल्या चार जिल्ह्यात ९० टक्क्यांवर पेरणी झालेली असतांना पावसाअभावी अकोला जिल्ह्यात मात्र टक्का माघारल्याचे दिसून येते.
पश्चिम विदर्भात १० जूनला मान्सूनचे आगमन झाले असले तरी सक्रिय नसल्याने पेरण्या रखडल्या होत्या. मात्र, महिनाभरानंतर म्हणजेच ९ जुलैपासून पाऊस पुन्हा सक्रिय झाल्याने खरिपाच्या पेरण्यांना गती आली. त्यापूर्वी १० ते १२ दिवस पावसात खंड पडल्याने काही भागात दुबार पेरणीचे संकट ओढावले होते. त्या पेरण्यादेखील आता आटोपल्या आहेत. अकोला जिल्ह्यात पावसाअभावी पेरण्या खोळंबल्या होत्या. त्यांनाही आता गती आल्याचे दिसून येते.
विभागीय कृषी सहसंचालक कार्यालयाच्या गुरुवारच्या अहवालानुसार अमरावती जिल्ह्यात ६,४९,५०० हेक्टरमध्ये पेरणी झालेली आहे. ही ९४ टक्केवारी आहे. यवतमाळ जिल्ह्यात ८,६८,२०० हेक्टरमध्ये पेरणी झाली. ही ९५ टक्केवारी आहे. वाशिम जिल्ह्यात ३,७७,९०० हेक्टरमध्ये पेरणी झाली. ही ९२ टक्केवारी आहे. बुलडाणा जिल्ह्यात ६,६७,२०० हेक्टरमध्ये पेरणी झाली. ही ९१ टक्केवारी आहे. याशिवाय अकोला जिल्ह्यात ३,६२,४०० हेक्टरमध्ये आतापर्यत पेरणी आटोपली. ही ७५ टक्केवारी आहे.
बॉक्स
सर्वाधिक १३.११ लाख हेक्टरमध्ये सोयाबीन
विभागात आतापर्यंत झालेल्या पेरण्यांमध्ये सर्वाधिक १३,११,१०० हेक्टरमध्ये सोयाबीनचे क्षेत्र आहे. सोयाबीनच्या सरासरी क्षेत्राच्या तुलनेत ही ८६ टक्केवारी आहे. याशिवाय कपाशीची ९,१६,८०० हेक्टर क्षेत्रामध्ये पेरणी झालेली आहे. ही सरासरीच्या ९३ टक्के क्षेत्र आहे. कृषी विभागाच्या मते आता सोयाबीनचे नापेर क्षेत्र कपाशीच्या क्षेत्रात रुपांतरीत होण्याची शक्यता आहे.
बॉक्स
असे आहे पीकनिहाय क्षेत्र
विभागात सद्यस्थितीत ५,३०० हेक्टरमध्ये धान, २७,००० हेक्टरमध्ये ज्वारी, १०० हेक्टरमध्ये बाजरी, २५,५०० हेक्टरमध्ये मका, १,३०० हेक्टरमध्ये इतर तृणधान्य, ३,७९,१०० हेक्टरमध्ये तूर, ५५,९०० हेक्टरमध्ये मूग, ४२,४०० हेक्टरमध्ये उडीद, ६०० हेक्टरमध्ये भुईमूग, ९०० हेक्टरमध्ये तीळ, १०० हेक्टरमध्ये सुर्यफुलाची पेरणी झालेली आहे.