कॅप्शन - शुभमला त्याच्या वडिलांकडे रहिमापूर पोलीस ठाण्यातून सुपूर्द करण्यात आले.
वनोजा बाग (अमरावती) : स्थानिक पोलिसांच्या गस्ती पथकाने बुलडाणा जिल्ह्यातील एका युवकाला शोधून नातेवाइकांच्या ताब्यात दिले.
शुभम वसंतराव दावले (३०, रा. देवढाबा ता. मलकापूर) असे सदर युवकाचे नाव आहे. दोन-तीन महिन्यांपूर्वी हरवल्याची नोंद मलकापूर ग्रामीण पोलीस ठाण्यात करण्यात आली होती. ठाणेदार सचिन इंगळे व कर्मचाऱ्यांच्या गस्ती पथकाने १७ एप्रिल रोजी चिंचोली बुद्रुक येथे एका युवकाला ताब्यात घेतले. मनोरुग्णसारख्या भासणाऱ्या या युवकाची चौकशी केली असता, तो बुलडाणा जिल्ह्यातील असल्याची माहिती मिळाली. ही माहिती मलकापूर ग्रामीण पोलीस ठाण्याला कळविताच त्याच्या हरविल्याची तक्रार पोलीस ठाण्यात दाखल असल्याचे कळविण्यात आले. मलकापूर पोलीस ठाण्यातील तपास अधिकाऱ्यासह नातेवाइकांना रहिमापूर पोलीस ठाण्यात बोलावून घेण्यात आले. त्यांना शुभमचा ताबा देण्यात आल्याचे ठाणेदार सचिन इंगळे यांनी सांगितले. त्याच्या नातेवाइकांनी रहिमापूर पोलिसांचे आभार मानले.