दीड वर्षांपासून, हाताला काम नाही
चांदूर बाजार : कोरोना महामारीमुळे शाळा, महाविद्यालये बंद आहेत. त्यामुळे विद्यार्थ्यांचे गणवेश शिवणाऱ्या कारागिरांच्या हाताला काम नाही. तसेच रेडिमेड गणवेशालाही मागणी नसल्याने दुकानदारदेखील आर्थिक अडचणीत आले आहेत. यंदाही शाळा सुरू होणार की, नाही याबाबत अनिश्चितता असल्याने टेलरसह व्यावसायिकांचा उदरनिर्वाहाचा प्रश्न ऐरणीवर आला आहे.
शाळा, महाविद्यालये नियमित सुरू असताना विद्यार्थी कापड घेऊन टेलरकडे यायचे व आपल्या मापाचे गणवेश शिवून घ्यायचे. काही विद्यार्थी रेडिमेड दुकानातून गणवेश विकत घ्यायचे. दोन्ही व्यावसायिकांचा धंदा दोन हंगामात अडचणीत आला आहे.
टेलरकडे शाळेच्या गणवेशासोबतच लग्नसराईतील ही कपडे नसल्यागत जमा आहे. कोरोनामुळे मोजक्याच मंडळींच्या उपस्थितीत विवाह समारंभाला परवानगी दिल्याने अनेकांनी घरीच विवाह उरकला. त्यामुळे कपडे शिवण्यापेक्षा रेडिमेडवरच भर दिला आहे. याचाही परिणाम टेलरच्या व्यवसायावर पडला आहे. आता अटी, शर्तीच्या अधीन राहून काही व्यवसाय सुरू झाल्याने दुकानदारांना दिलासा मिळाला आहे. अनावश्यक खर्च करण्यासाठी सर्वसामान्यांकडे पैसा शिल्लक नसल्याने वेळ भागविणे सुरू आहे. यामुळे नवीन कापड खरेदी करून टेलरकडे शिवायला टाकणे सध्या बंदच आहे. शहरात बऱ्याच टेलरच्या दुकानासमोर येथे शाळेचे गणवेश शिवून मिळतील व प्रत्येक शाळा, कॉलेजचे गणवेशाचे कापडही उपलब्ध आहे. अशा पाट्या लावण्याची वेळच आली नाही. साधारणपणे ग्रामीण भागात १५ ऑगस्टपर्यंत हे काम चालत होते. मात्र शाळा बंद असल्याने हे कामही बंद आहे. त्यामुळे व्यावसायिकावर उपासमारीची वेळ आली आहे.