दोन्ही आरोपी अचलपूरचे
परतवाडा : बैतूल रोडवर, शहराला लागून असलेल्या हॉटेल द्वारकामधील मारहाण व लुटमार प्रकरणात एका आरोपीला अटक करण्यात पोलिसांना यश आले आहे. त्याचा साथीदार मात्र फरार आहे. या प्रकरणातील दोन्ही आरोपी अचलपूरचे असल्याचे पोलीस तपासात निष्पन्न झाले आहे.
हॉटेल द्वारकामध्ये ३ डिसेंबरला सायंकाळी मारहाणीची घटना घडली होती. हे दोन्ही आरोपी जेवणाकरिता तेथे गेले होते. त्यांना हॉटेलच्य व्यवस्थापकाने बिलाची रक्कम मागितली असता, त्या आरोपींनी मारहाण केली. गल्ल्यातून सहा हजार रुपये लंपासही केले. यावर पोलिसांनी त्यांच्याविरुद्ध भादंवि कलम ३९४, ३४ अन्वये गुन्हा दाखल केला. हॉटेलमधील सीसीटीव्ही फुटेजच्या आधारे आरोपींचा शोध घेतला. स्थानिक गुन्हे शाखेच्या पथकाने ७ डिसेंबरला सचिन भामोरे (२३, रा. चावलमंडी, अचलपूर) याला अटक करून परतवाडा पोलिसांच्या स्वाधीन केले. सचिनचा मित्र व दुसरा आरोपी सागर सोनोने (रा. अचलपूर) हा फरार असून, पोलीस त्याचा शोध घेत आहेत.
जिल्हा पोलीस अधीक्षक हरिबालाजी एन., अपर पोलीस अधीक्षक श्याम घुगे यांच्या मार्गदर्शनात पोलीस निरीक्षक अजय आकरे, गोपाल उपाध्याय व त्यांच्या सहकाऱ्यांनी ही कारवाई केली. घटनेचा पुढील तपास परतवाडा पोलीस करीत आहेत.