चांदूर बाजार : रमजान हा मुस्लिम समाजाचा अत्यंत पवित्र महिना. मुस्लिम बांधवांच्या या पवित्र उत्सवाच्या पर्वाला नुकतीच सुरुवात झाली. मात्र, सलग दुसऱ्या वर्षी कोरोनाचे सावट पसरले आहे. यावर्षीही शासनाने कोरोना संसर्ग टाळण्यासाठी सर्वांसाठी कडक निर्बंध लादले आहेत. परिणामी मुस्लिम समाजाला आपल्या सर्व धार्मिक विधी घरच्या घरीच पार पाडाव्या लागतील. सणाच्या सामूहिक आनंदाला मुस्लिम समाज यंदाही मुकणार आहे. कोरोनाचा परिणाम बाजारपेठेवरही दिसून येत आहे.
मुस्लिम समाजात रमजान महिना हा धार्मिकदृष्ट्या पवित्र महिना गणला जातो. या महिन्यात सर्वच आबालवृद्ध खुदाची विशेष इबादत करतात. त्यामुळे मुस्लिम बांधवांमध्ये सर्वदूर आनंदाचे वातावरण असते. मुस्लिम कॅलेंडरनुसार नववा असलेला हा महिना खुदाच्या इबादतचा पवित्र महिना म्हणून मानला जातो. या महिन्यात लहानांपासून तर वृद्धांपर्यंत सर्व जण आपल्या शारीरिक ऐपतीप्रमाणे निर्जला उपवास करतात. त्यांचा हा उपवास दररोज सूर्योदयापूर्वी सुरू होतो, तर सूर्यास्ताला संपतो. त्यावेळी मुस्लिम बांधव एकत्र येऊन दररोज इफ्तार साजरी करतात. रमजान महिनाभर दररोज रात्रीला मुस्लिम बांधव तरावीहची विशेष नमाज अदा करतात. त्यासोबतच दररोज कुराण पठण करून इतरही धार्मिक विधी सातत्याने पार पाडतात. रमजान महिन्याच्या पवित्र पर्वाचा समारोप ईदच्या दिवशी केला जातो. यावेळी मुस्लिम बांधव एकमेकांना गळाभेट देतात. परंतु, कोरोनाने या सणाच्या आनंदावर गतवर्षी विरजण पडले. यंदाही तीच स्थिती आहे.
रमजान महिन्यात पहाटेच्या सहेरीपासून सुर्यास्ता नंतरच्या इफ्तारकरिता लागणाऱ्या विविध खाद्यपदार्थांच्या
खरेदीसाठी शहरातील बाजारपेठ खुली झालेली नाही. त्यातच कोरोनामुळे घरच्या घरी नमाज अदा करण्यास सांगण्यात आले आहे. चिमुकलेही कोरोनाने उद्भवलेल्या स्थितीने हिरमुसले आहेत.
--------
कोट येत आहे.