अमरावती : महादेव खोरी स्थित जंगल परिसरात एका झाडाच्या फांदीला अल्पवयीन प्रेमीयुगुलाचा मृतदेह गळफास लावलेल्या अवस्थेत आढळून आला होता. या प्रकरणात जिल्हा सामान्य रुग्णालयातील डॉ. विशाल गावंडे यांनी मुलीच्या मृतदेहाचा शवविच्छेदन अहवाल फ्रेजरपुरा पोलिसांना दिला असून, तिचा मृत्यू गळफासानेच झाल्याचे स्पष्ट झाले आहे.
मुलाच्या मृतदेहाचा शवविच्छेदन अहवाल अद्याप प्राप्त झालेला नसून, तो गुरुवारी मिळणार असल्याची माहिती पोलीस सूत्रांनी दिली. या अहवालामुळे घातपाताचा संशय दूर झाला. मुलाचा अधिकृत अहवाल गुरुवारी प्राप्त होणार असल्याने मुलाच्याही आत्महत्येचे गूढ उलगडलेले नाही. महादेवखोरीच्या जंगलात १६ वर्षीय मुलीने, तर १७ वर्षीय मुलाने गळफास घेऊन आत्महत्या केल्याची घटना शुक्रवारी उघडकीस आली. याप्रकरणी पोलिसांनी दोन्ही मुला-मुलींच्या आई-वडिलांचे बयाण नोंदविले. मात्र, आत्महत्येसारखा टोकाचा पाऊल मुलांनी का उचलला हे अद्याप पोलिसांच्या तपासातून निष्पन्न झालेले नाही.