फोटो पी २५ गॅरेज
अमरावती : चपराशीपुरास्थित मोटर गॅरेजमधून स्पेअर पार्ट चोरणाऱ्या दोन अट्टल चोरांना गुन्हे शाखेच्या पथकाने बुधवारी जेरबंद केले. मारोती सुनील आत्राम (३२, रा. पांढरकवडा जि. यवतामळ) व राजकुमार महादेव वानखडे (५२ रा. सोनारखेडा ता. भातकुली, ह.मु.शुक्रवार बाजार अमरावती) अशी अटक आरोपींची नावे आहेत.
गुन्हे शाखेचे पथक २३ ऑगस्ट रोजी पेट्रोलिंग करीत असताना सुंदरलाल चाैकात दोन इसम संशयास्पदरीत्या मिळून आले. त्यांचेजवळ दोन प्लाॅस्टिकचे पोते दिसून आले. पोत्याची पाहणी केली असता, त्यात गॅरेजमधील जुने व नवीन वाहनाचे सुटे भाग दिसून आले. त्यांना गुन्हे शाखेत आणून सखोल चाैकशी केली असता, त्यांनी चपराशीपुरा येथील जामा मस्जिदजवळील गॅरेजमधून ते चोरी केल्याची बाब उघड झाली.
त्याबाबत फ्रेजरपुरा पोलीस ठाण्यात २३ ऑगस्ट रोजी गुन्हा दाखल आहे. चोरी गेलेला संपूर्ण मुद्देमाल हस्तगत करून आरोपींना पुढील कारवाईकरिता फ्रेजरपुरा ठाण्यात देण्यात आले. पोलीस आयुक्त आरती सिंह यांह्या आदेशाने पोलीस उपायुक्त विक्रम साळी, गुन्हे शाखेचे वरिष्ठ पोलीस निरीक्षक अर्जुन ठोसरे यांच्या मार्गदर्शनात सहायक पोलीस निरीक्षक पंकज चक्रे, पोलीस जमादार राजेंद्र काळे, सुलतान, विशाल वाकपांजर, चालक प्रशांत नेवारे यांनी ही कारवाई केली.