ग्रामपंचायत निवडणुकीसाठी स्थानिक प्रशासन सज्ज
चांदूर रेल्वे - तालुक्यात २९ ग्रामपंचायतींची निवडणूक लढविणाऱ्या अंतिम उमेदवारांची यादी असलेल्या ईव्हीएम मशीनचे सीलिंग शनिवारी सकाळी १० ते सायंकाळी ४ या वेळेत करण्यात आले. निवडणूक लढविणाऱ्या उमेदवारांच्या नावाची तयार करण्यात आलेली मतपत्रिका ईव्हीएम मशीनवर लावण्याचे काम उमेदवार आणि त्यांचे प्रतिनिधी यांच्या उपस्थितीत करण्यात आले. सदर प्रक्रिया निर्वाचन अधिकारी तथा तहसीलदार राजेंद्र इंगळे यांच्या देखरेखीत पार पडली.
यंत्रे सीलबंद करण्यापूर्वी सर्व उमेदवार, निवडणूक प्रतिनिधींना उपस्थित राहण्याच्या सूचना देण्यात आल्या होत्या. निवडणूक रिंगणात उभ्या असलेल्या सर्व उमेदवारांच्या यादीप्रमाणे मतदान यंत्रे सील करण्यात आली. या प्रक्रियेत निवडणुकीदरम्यान कुठलेच यंत्र बंद पडणार नाही, याची खबरदारी घेण्यात आली. निवडणुकीकरिता ९२ मतदान केंद्रांवर प्रत्यक्ष मतदानकामी लागणारे ९२ व राखीव १० अशी मिळून एकूण १०२ मतदान यंत्रांची सीलिंग प्रक्रिया पूर्ण करून ती तहसील कार्यालयातील स्ट्राँगरूममध्ये ठेवण्यात आली व स्ट्राँग रूम पोलिसांच्या ताब्यात देण्यात आली. सदर परिसरात सीसीटीव्ही कॅमेरेसुद्धा लावण्यात आले. ही प्रक्रिया १५ टेबलवर ७० कर्मचाऱ्यांनी पार पाडली. या सर्व प्रक्रियेच्या वेळी निर्वाचन अधिकारी राजेंद्र इंगळे उपस्थित होते.