मुलीला भेटण्याच्या बहाण्याने घटस्फोटित पत्नीवर बलात्कार

अमरावती : मुलीला भेटण्याचा बहाणा करून पतीने घटस्फोटित पत्नीशी जबरीने शारीरिक संबंध प्रस्थापित करून तिच्याशी अनैसर्गिक कृत्य केले. ही धक्कादायक घटना राजापेठ हद्दीतील कंवरनगरात ३० एप्रिल रोजी उघडकीस आली. ३५ वर्षीय पीडित महिलेच्या तक्रारीवरून राजापेठ पोलिसांनी आरोपी प्रशांत उर्मीलेश सिंग (वय ४०, रा. ढत्तरपल्ली, बेनाचिटी दुर्गापूर, जि. बुरर्दबान, राज्य पश्चिम बंगाल) याच्याविरुध्द गुन्हा नोंदविला. पोलीस सूत्रानुसार, पीडितेच्या तक्रारीनुसार, तिचे २३ फेब्रुवारी २०१४ रोजी प्रशांत सिंग याच्याशी वैदिक पध्दतीने पुणे येथे लग्न झाले. त्यानंतर त्यांना एक मुलगी झाली. आता ती चार वर्षांची आहे. परंतु, आपसी वादामुळे त्यांनी २०१७ मध्ये न्यायालयातून घटस्फोट घेतला. त्यानंतर १५ जून २०१९ राजी प्रशांत सिंग हा मुलीला भेटण्यासाठी पत्नीच्या घरी पोहोचला. दुसऱ्या दिवशी रेल्वे असल्यामुळे पूर्वाश्रमीचा पती घरीच थांबला. दरम्यान, रात्रीच्या वेळेत प्रशांत पत्नीशी बोलण्याचा प्रयत्न करू लागला. त्याने तिच्याशी लगट साधण्याचे प्रयत्न केला. परंतु, पत्नीने धक्का देऊन प्रशांतला दूर सारले. त्यावेळी प्रशांतने पत्नीला तिचे काही अश्लील छायाचित्रे दाखवून तिला शरीरसुखाची मागणी केली आणि छायाचित्रे व्हायरल करण्याची धमकी दिली. त्यानंतर प्रशांतने पत्नीशी जबरीने शारीरिक संबंध व अनैसर्गिक कृत्य केले. ही बाब कुणाला सांगितली तर मुलीला जिवे मारण्याचीही धमकीही दिली. या घटनेची तक्रार पीडित महिलेने ३० एप्रिल रोजी राजापेठ पोलिसांत नोंदविली. त्यानुसार पोलिसांनी आरोपी प्रशांत सिंगविरुध्द भादंविची कलम ३७६(ब),३७७,५०६(ब) अन्वये गुन्हा नोंदविला आहे.