इंदल चव्हाण ल्ल अमरावतीबडनेरा- अकोला मार्गावर सोमवारी रात्री १२.३० वाजतादरम्यान ट्रक व आॅटोचा भीषण अपघात झाला. यामध्ये चौघे जागीच ठार, तर एक गंभी जखमी झाला. ठार झालेल्यांपैकी तिघे नवविवाहित होते. त्यातील एकाला अवघ्या पाच महिन्यांचा मुलगा असल्याची माहिती आहे. माहितीनुसार, अमर उर्फ बंटी रणधीर ठाकूर (२३), विजय नारायण साहू, मोहन चंद्रमोहनसिंग वर्मा, प्रमोद ऊर्फ लल्ला ओमप्रकाश मिश्रा (सर्व रा. बडनेरा) अशी मृतांची तर गौरव यादव असे गंभीर जखमी झालेल्या युवकाचे नाव आहे. हे पाचही कट्टर मित्र होते. ते आॅटोरिक्षा चालवून संसाराचा गाडा चालवीत होते. मित्रांनी पार्टीचा बेत आखून रात्री जेवण करण्याकरिता मोहन वर्मा यांचा आॅटो क्रमांक एमएच २७ ए एफ १८३८ ने प्रिन्स ढाब्यावर गेले होते. जेवण आटोपल्यानंतर बडनेऱ्याकडे परतताना विरुद्ध दिशेने येणाऱ्या ट्रक क्रमांक एमएच०४ एफयू ९३३८ ने सुरभी फार्म हाऊसजवळ चिरडल्याने त्यांच्यावर काळाची झडप पडली. मृतांपैकी तिघे नवविवाहित होते. त्यांचे वर्षभरापूर्वीच लग्न झाले असून प्रमोद मिश्रा यांना ५ महिन्यांचा गोंडस मुलगा आहे. मिश्रा यांचा मोठा परिवार आहे. या दुर्घटनेमुळे त्यांच्या पत्नीवर संकट कोसळले आहे. या घटनेमुळे परिसरात शोककळा पसरली असून आॅटो युनियनने दुखवटा व्यक्त केला आहे.
विझले तिन्ही नवविवाहितांचे संसार...
By admin | Updated: June 17, 2015 00:42 IST