मोर्शी : विहिरीतील मोटर पंप सुरू करण्याकरिता स्टार्टरचे वायर लावत असताना अचानक वीजपुरवठा सुरू झाल्याने त्याचा स्पर्श होऊन शेतकऱ्याचा जागीच मृत्यू झाला. तालुक्यातील खानापूर शिवारात सकाळी ९ च्या सुमारास ही घटना घडली.
आशिष रमेश उकंडे (३२) असे मृत शेतकऱ्याचे नाव आहे. फवारणी असल्याने तो शेतात गेला होता. हल्ली शेतातील वीज ही सिंगल फेज असल्याने सकाळी साडेनऊ वाजताच्या सुमारास वीजपुरवठा सुरळीत होतो. इतर वेळी वीजपुरवठा खंडित असतो. नेमका याच वेळी वीजप्रवाह सुरू झाल्याने आशिषचा मृत्यू झाला. चार महिन्यांपूर्वी लॉकडाऊन दरम्यान आशिषचा विवाह झाला होता. त्याच्या अकस्मात मृत्यूबद्दल गावात हळहळ व्यक्त होत आहे.
मोर्शी पोलिसांनी घटनास्थळाचा पंचनामा करून मृतदेह मोर्शी उपजिल्हा रुग्णालयात शवविच्छेदनाकरिता पाठविला. दुपारी साडेतीनच्या सुमारास शोकाकुल वातावरणात त्यांच्यावर अंत्यसंस्कार करण्यात आला.