अमरावती : पत्नीच्या गळ्यातील मंगळसूत्र तोडून त्यावर तुझा अधिकार नाही, असे बजावून एका विवाहितेला घराबाहेर काढण्यात आले. मला सोडून दे, अन्यथा तुझ्या लहान भावाला मारून टाकेन, अशी धमकीदेखील पतीने दिल्याची तक्रार पीडिताने फ्रेजरपुरा पोलिसांत नोंदविली आहे.
याप्रकरणी प्रशांत काकडे (३५), रामदास काकडे व सचिन रामदास काकडे (सर्व रा. कळंब, जि. यवतमाळ) व तीन महिलांविरूद्दविरूद्ध फ्रेजरपुरा पोलिसांनी कलम ३२३, ५०४, ५०६ अन्वये गुन्हा दाखल केला आहे. २७ एप्रिल २०१८ ते १७ फेब्रुवारी २०१९ दरम्यान हा प्रकार घडला. तक्रारीनुसार, पती प्रशांत याने आपला अनन्वित छळ केला. मला तू आवडत नाहीस, मला सोडून दे, अन्यथा तुझ्या लहान भावाला मारून टाकेन, अशी धमकी पतीने दिली. तर, अपत्य होत नाही, म्हणून अन्य आरोपींनी देखील तिची छळवणूक केली.
आरोपीचे अन्यत्र प्रेमसंबंध असून, पिडिता ही १७ फेब्रुवारी २०१९ रोजी सासरी कळंब येथे नांदावयास गेली असता, आरोपी प्रशांतने तिच्या गळ्यातील मंगळसूत्र तोडून स्वत:जवळ ठेवले. व पुन्हा सहाही आरोपींनी तिला मारहाण करून घरातून हाकलून दिले. याबाबत तिने महिला सेलकडे तक्रार नोंदविली. मात्र, तेथे समेट घडून न आल्याने पोलीस उपायुक्तांच्या आदेशाने गुन्हा दाखल करण्यात आला.